Соңғы жылдары еліміздің сот жүйесінде жүргізіліп жатқан реформалардың негізгі мақсаты халықтың сотқа деген сенімін арттыру болып табылады. Азаматтардың сот жүйесіне деген сенімі мемлекетке деген сенімді қалыптастыруға ықпал етеді. Халықтың сотқа деген сенімі қолжетімді сот төрелігі, судьялардың беделі және негізделген шешімдер арқылы қалыптасады. Осы себепті, соңғы жылдары осы бағытта көптеген жұмыстар атқарылды.
Сот жүйесін жаңғырту реформасы қазіргі уақытта белсенді кезеңде. Президенттің бағдарламалық құжаттарында айтылған тапсырмалар тұрақты түрде орындалып келеді. Қоғамға тек реформалар ғана емес, сонымен қатар сот төрелігінің сапасы да маңызды. Халықтың сот жүйесіне деген үміті мен сұранысы күннен-күнге артып келеді.
Сот жүйесінде сот төрелігін жүзеге асырумен қатар, соттардың қызметін ұйымдастыру да маңызды рөл атқарады. Осы орайда, Департаменттің құзіреті кеңейіп, жауапкершілік артты. Қазіргі уақытта сот процессін дайындау, судьялардың қызметін қамтамасыз ету, сот тәжірибесін талдау, статистикалық есептерді қалыптастыру және сот мұрағатын басқару – біздің басты бағыттарымыз.
Азаматтардың сот жүйесіне деген сенімін арттыру – біздің басты мақсатымыз. Бізге жүктелген жауапкершілік өте үлкен. Біз сот жүйесінің ашықтығы мен қолжетімділігін қамтамасыз ету үшін жұмыс істейміз.
Бүгінгі таңда азаматтарға электронды ақпараттық технологияларды пайдалану мүмкіндігі берілген. Тұрғындар сотқа өтініштерін «Сот кабинеті» және «Е-өтініш» жүйелері арқылы жібере алады. Бұл сервистердің ерекшелігі – әрбір азамат немесе оның өкілі өзіне ыңғайлы уақытта, үйінен шықпай-ақ, интернет арқылы сотқа талап-тілектерін жолдай алады. «Сот кабинеті» сервисінің мүмкіндіктері өте ыңғайлы, ол арқылы талап қою, шағымдар мен өтінішхаттар беруге, мемлекеттік бажды онлайн төлеуге болады.
Электронды сот құжаттарын қарау, сақтау, жүктеу, істің қаралу динамикасын бақылау, бейнематериалдарды көру, апелляциялық шағымдар мен басқа да өтініштермен жүгіну мүмкіндігі бар. Азаматтардың құқықтары мен бостандықтарын қорғау мақсатында сот залдары заманауи техникалармен жабдықталып, сот процестері аудио-бейне жазба құрылғыларымен өткізіледі. Бұл сот процестерінің ашық әрі әділ өтуіне ықпал етеді. Жаңа технологияларды қолдану сот қызметін ашық, жедел және қолжетімді етеді. Біз бұл жетістіктермен шектелмей, алдағы межелерімізді жүзеге асыруды мақсат етіп отырмыз. Азаматтардың сенімі мен тәртіптің сақталуы – ең бастысы.
Досболдатқа АЗНАБАЙ,
Шымкент қаласының
мамандандырылған тергеу сотының
жетекші маманы.
