Мемлекеттің Жастар саясатында жас ұрпақ жан-жақты жетілген азаматтар болып ержетуі үшін арнаулы бағдарламалар мен жоспарларға сай әртүрлі бағытта жұмыстар жүргізіледі. Сондай жұмыстардың бірі жас ұрпаққа елімізге, аймағымызға танымал, өз ісінің майталманы атанған тұлғалардың өнегелі өмірін насихаттау болып табылады.
Түркістан қалалық Жастар орталығының ұйымдастыруымен «Арманға жету жолындағы алғашқы қадамдар» тақырыбында ҚР Мәдениет қайраткері, Түркістан қаласының Құрметті азаматы, «Би падишасы» атанған Ұлжалғас Мұстафаевамен кездесу кеші өтті.
Мазмұнды кештің мақсаты — эстетикалық сезім мен талғамды қалыптастыратын құдіретті би өнерін жастарға шабыт беретін рухани құндылық ретінде насихаттау. Әрі жастардың ел қадірлеген тұлғаның өмірімен танысып өнеге алуы мен соған еліктеп ертеңгі күні атпал азамат болып қалыптасып, еліне белсенді қызмет етіп, еңбек жасауына жол ашу.
Кездесу кеші би өнерінің тарихымен танысудан басталып, әрі қарай өнер иесінің шығармашылық жолы туралы тартымды тақырыпта әңгіме өрбіді. Кездесуге би падишасының замандас достары мен қаладағы белсенді жастар қатысты.
Сахна саңлағының би өнеріндегі мыңдаған шәкірттері бүгінде еліміздің түкпір-түкпірінде қызмет етеді. Шәкірт үшін адамгершіліктің ең жоғарғы үлгісі – ұстаз. Ардақты ұстазды ел қадірлеп, шәкірттері ерекше құрметтейді.
Би өнерінің білгірі Ұлжалғас Мұстафаева кездесу барысында жастардың сұрағына жауап беріп, жетістікке жету жолындағы ұстанымдарымен бөлісті. Ел ертеңі жастарға деген жүрекжарды лебізін білдіріп, баянды бақыт тіледі.
