Бүгін Түркістан облыстық экономикалық тергеп-тексеру департаментінің бастамасымен елімізде алғаш рет «ҚР Қаржылық мониторинг агенттігінің» саябағы ашылды. Түркістан қаласындағы Бекзат Саттарханов даңғылының бойында орналасқан саябақтың ашылу салтанатына Түркістан облысы әкімінің орынбасары Бейсен Тәжібаев, Түркістан қаласының әкімі Нұрбол Тұрашбеков, облыстық экономикалық тергеп-тексеру департаментінің басшысы Ерболат Балғабаев және облыстағы барлық жастар орталықтарының басшылары арнайы қатысты.
— Түркістан бұрынғы Яссы кезінде жасыл желекке оранған мәуелі қала болған. Бүгінгі жаңарған Түркістанды да қайта табиғаты тамаша, ауасы таза қала боларына сенім мол. Сондықтан да бүгінгі ашылып жатқан саябақтың біздің киелі қаламыз үшін маңызы жоғары болмақ, — деді облыс әкімінің орынбасары Бейсен Дәулетұлы.
Шара барысында саябақтың сәнін келтіретін ағаш түптерін отырғызу рәсімі өтті. Айта кетейік, ондағы ағаштарды еліміздің 20 облыс-қалаларының экономикалық тергеп-тексеру департаменттері жолдаған. Сонымен қатар, Қазақстанның Халық әртісі Димаш Құдайбергеновтің де арнайы жолдаған талы егілді. Жалпы 500-ге жуық ағаш отырғызу жоспарланса, бүгін 100 ағаш түптері егілді.
Саябақтың ерекшелігі — онда 30 жерде QR кодтар орналастырылған. Азаматтар бұл кодтарды сканерлеу арқылы елімізде қаржылық пирамида ретінде танылған ұйымдардың толық тізімін көре алады. Осы арқылы қаржылық пирамидаға алданушылар санын азайтатынын жеткізді ұйымдастырушылар. Саябақтың ашылу салтанаты өнерпаздардың әсем әндері мен мың бұралған билерімен жалғасын тапты.
Түркістан облысының Өңірлік коммуникациялар қызметі
