Бүгін Ордабасы ауданындағы Ықыластемір ауылында Республика күні қарсаңында жаңа фельдшерлік-акушерлік бекеттің ашылу салтанаты өтті. Шараға қатысқан аудан басшысы Азат Әбдіғалиұлы жаңа ғимарат ел игілігіне қызмет ете беруін жеткізді.
— Мемлекет басшысының Жолдауында айтылған денсаулық сақтау саласын, оның ішінде ауылдық аймақ медицинасын қолдау мақсатында ауданымызда тындырымды тірліктер атқарылуда. Атап айтар болсақ, аймақта іргетасы қаланған 6 ФАП құрылысының 4-і ем алушыларға қызмет көрсете бастады. Бүгін ауылымызда ашылған нысан соның дәлелі. Жыл соңына дейін тағы 2 ғимараттың құрылысын аяқтау жоспарланған. Осы орайда ауыл тұрғындарын заманауи денсаулық сақтау мекемесінің салтанатты ашылуымен құттықтаймын, — деді аудан әкімі өз сөзінде.
Аталған нысанды мердігер мекеме «Astana Koktem Group» ЖШС 2022 жылы бастап, биыл күз айында толықтай аяқтап отыр. Қазіргі таңда денсаулық сақтау мекемесінде 20-ға тарта маман емделушілерге қызмет көрсетеді.
Түркістан облысының Өңірлік коммуникациялар қызметі
