Бүгін «AMANAT» партиясы Шымкент қалалық филиалында сыбайлас жемқорлыққа қарсы іс-қимыл жөніндегі кеңестің отырысы өтті. Жиынды «Сайрам көмекші мектеп- интернат-колледжі арнайы кешені» коммуналдық мемлекеттік мекемесінің директоры, аталмыш кеңестің төрайымы Жадыра Таңатарова жүргізді. Күн тәртібіндегі мәселе бойынша үшінші шаһардың денсаулық сақтау басқарма басшысының орынбасары Бақытжан Абдуллаев баяндама жасап, жиынға қатысушылардың сауалдарына жауап берді.
— Жалпы, жемқорлыққа қарсы күрес жан-жақты, үздіксіз, ашық әрі әділетті түрде жүргізілуі тиіс, сонда ғана біз алға қойған биік мақсаттарға қол жеткізетініміз анық. «AMANAT» партиясының 2023-2027 ж.ж. «Халықпен бірге!» атты Шымкент қаласының сайлауалды бағдарламасының орындау үшін әзірленген Жол картасындағы денсаулық сақтау басқармасы мен оған қарасты мекемелерінде сыбайлас жемқорлыққа қарсы іс-қимыл жөніндегі жұмыс барысы басты назарда, — деді өз сөзінде Жадыра Нағашыбайқызы.
Сонымен қатар, аталмыш кеңес мүшесі Азат Әміртай бүгінгі таңда қаладағы перзентханаларда сәбилерді шығару кезіндегі даңғаза әрекеттерге заң аясында шектеулер қою керек деген ұсыныс білдірді. Оның айтуынша, перзентханада тек қуаныш қана емес, басқа да жағдайлар болады. Бір ана сәбиін құшағына алып қуанып жатса, кейбірі жансақтау бөлімінде өмір үшін күресіп жатады. Сондықтан, сәбиді үйге шығаруға барған көпшілік оны шоуға айналдырмағаны жөн.
