Бүгін Түркістан облысы дін істері басқармасының ұйымдастыруымен облыс орталығындағы «Яссы» спорт кешенінде «18 қазан – Рухани келісім күні» мерекесіне орай спорттық сайыстар ұйымдастырылды.
Сайысқа қатысушылар спорттың төрт түрінен бақ сынады. Атап айтсақ, 2 кезеңнен тұратын шағын футболдан турнир мен командалық арқан тартыс, сондай-ақ, кір тасын (гир) көтеру мен қол күрес (армрестлинг). Оған облыс көлеміндегі діни тұрақтылықты қамтамасыз ету бағытында жұмыс атқаратын мемлекеттік мекеме қызметкерлері және діни бірлестік өкілдері қатысты.
Бұл іс-шараға ҚМДБ Түркістан облысы бойынша өкілдігі мен «Шымкент епархиясының Түркістан қаласындағы Свято-Никольский приходы» жергілікті православиелік діни бірлестігі, «Сарыағаш медресе колледжі» мен «Балаби қарилар дайындау орталығы», Қазақстан Халқы ассамблеясы, Қ.Ясауи атындағы ХҚТУ, ҚР ҰҚК Түркістан облысы бойынша департаменті, ТО Полиция департаменті мен Дін істері басқармасының спорттық командалары қатысты.
Турнир жеңімпаздарын марапаттау рәсімі салтанатты жағдайда өткізілді. Марапаттау шарасында сөз алған Түркістан қаласы әкімінің орынбасары Ерлан Күзембаев және Түркістан облысы дін істері басқармасының басшысы Рүстем Сабыржанұлы Рухани келісім күнінің маңыздылығына тоқталып, жарысқа қатысушыларға алғысын жеткізді.
Сайыс қорытындысында шағын футболдан Түркістан облыстық Полиция департаментінің командасы (100 мың теңге) жеңімпаз атанды. Екінші орынды ҰҚК Түркістан облысы бойынша департаменті (70 мың теңге), үшінші орынды Сарыағаш медресесі (50 мың теңге) иеленді. Бұл спорт түрінде «Үздік қақпашы» болып Сарыағаш медресесінен Әбдіразақ Мұхаммедәли танылса, «Үздік қорғаушы» номинациясы Аташев Ғалымжанға (ҚМДБ), «Үздік шабуылшы» атағы (ТО ҰҚК) Жандос Ысқақовқа, «Үздік ойыншы» номинациясы Байдулла Ерікке (Полиция департаменті) бұйырды. Үздік номинация иегерлерінің әрқайсысына 15 мың теңгеден қаржылай сыйлық табыс етілді.
Ал, командалық арқан тартыс сайысында Полиция департаменті қызметкерлері топ жарып, олар 40 мың теңге көлемінде сыйақы алды. Екінші орынды Дін мәселелерін зерттеу орталығы (30 мың теңге), үшінші орынды Сарыағаш медресесі (20 мың теңге) иемденді. Кір тасын (гир) көтеруде Сарыағаш медресесі командасы (30 мың теңге) чемпион атанса, екінші орынды Полиция департаменті командасы (20 мың теңге), үшінші орынды ТО ҰҚК командасы (10 мың теңге) жеңіп алды.
Қол күресте (армрестлинг) Полиция департаменті командасы қарсылас шыдатпады, олар 30 мың теңге көлемінде жүлдені иеленді. Ал, Балаби Қари құран жаттау орталығы командасы (20 мың теңге) екінші орыннан көрінсе, үшінші орынды ҚМДБ командасы (10 мың теңге) түйіндеді. Жеңімпаздар дипломдармен, қаржылай сыйлықтармен және естелік кубокпен марапатталды.
Айта кетейік, бүгінгі іс-шара аясында Түркістан облысы дін істері басқармасының басшысы Р.Сабыржанұлы облыстағы діни конфессия жетекшілерін қабылдады. Қабылдау соңында діни конфессиялар жетекшілеріне мерекеге орай алғыс хаттар мен сыйлықтар тапсырылды.
Еске салсақ, 1992 жылғы 18 қазан күні Алматы қаласында Бүкіләлемдік Рухани келісім конгресінің 1-ші сессиясы өтті. Конгреске қатысушылар қазанның 18-ін рухани келісім күні – қақтығыстар мен жанжалдарға шектеу қою, татулыққа талпыну, жақын адамдарға қайырымдылық пен жәрдем жасау күні деп жариялауға шақырған манифест қабылдады. Биыл бұл жалпыұлттық мерекені Қазақстан 30-ші рет өткізіп отыр.
Түркістан облысының Өңірлік коммуникуациялар қызметі
