Маусым айының үшінші жексенбісі – медицина қызметкерлері күні. Кәсіби мереке қарсаңында Мақтаарал ауданының әкімі Бақыт Асанов мәдениет үйінде бірқатар дәрігерлер мен медбикелерді қабылдап, сый-құрмет көрсетті.
«Адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, құрметтеген. Қандай қиын сәттер мен ауыр жағдайлар болсын, дәрігерлер мен мейірбикелер өз істеріне мұқият қарап, адам жанының арашашысы бола білді. Дәуірлер алмасса да, олардың Гиппократ антына адалдығы сол күйінде қалып отыр. Әсіресе, еліміздегі әлемдік індетпен күрес жолында тәулік бойы көз ілмей, тәуекелге бел буып, адам өміріне араша түскен дәрігерлердің еңбектері нағыз ерлікке пара-пар екеніне қалың жұртшылық көз жеткізді» деді Бақыт Насырханұлы.
Салтанатты жиын барысында «Amanat» партиясы Мақтаарал аудандық филиалының төрағасы Досым Асабаев, «Мырзакент» аудандық ауруханасының бас дәрігері Берік Есімханов сөз алып, белсенді еңбегімен көзге түсіп жүрген ақ халатты абзал жандарды Алғыс хаттармен марапаттады. Ал, аудандық Мәдениет үйінің қызметкерлері жиналғандарға концерттік бағдарлама ұсынды.
Айта кетейік, қазақстандықтардың денсаулығын жақсарту – еліміздің мемлекеттік саясатының басым бағыттарының бірі. Елімізде денсаулық сақтау саласын дамыту, тұрғындарға заман талабына сай, қолжетімді және сапалы медициналық қызмет көрсету жолында бар мүмкіндіктер жасалуда.
