Еліміздегі әрбір бесінші азамат дүниеге келетін, яғни туу көрсеткішінің деңгейі жоғары Түркістан облысында ана мен баланың денсаулығын қорғау маңызды мәселе. Осыған орай, облыс орталығында бой көтеріп жатқан 120 орынға лайықталған Ана мен бала орталығы келесі жылдың соңында пайдалануға берілмек. Бұл туралы өңірге жасаған сапары барысында Денсаулық сақтау министрі Ажар Ғиният мәлімдеді.
Министрдің айтуынша, Түркістан облысында 65 мыңға жуық бала дүниеге келген. Көрсеткіш жыл өткен сайын өсіп келеді. Ортылық іске қосылғаннан кейін ауыл тұрғындарының медициналық қызметке қол жетімділігі одан әрі артып, ана мен бала денсаулығына ерекше көңіл бөлінеді.
Сонымен қатар, Денсаулық сақтау министрі осы жылдың тамыз айынан бастап, шалғайдағы ауыл, аудан тұрғындары толық профилактикалық тексеруден өтеді. Ол үшін әрбір ауылға арнайы жылжымалы медициналық көлік жөнелтіледі. Бұдан бөлек еліміздің бас дәрігері халық саны 500-ден асатын барлық елді мекендерге фельдшерлік-акушерлік пункттер салынатынын жеткізді.
Марат Пашимов, облыстық қоғамдық денсаулық сақтау басқармасының басшысы:
— Сарыағаш және Ордабасы ауданында екі үлкен перинаталды орталық салынады. Қосымша Арыс қаласында жаңа емхана салынатын болады. Осы қыркүйек айында аталған нысандардың құрылысы басталады. Жаңа денсаулық сақтау министрі айтқандай, Түркістан қаласында Ана мен бала орталығы салынады. Келесі жылдың соңында пайдалануға беріледі. Ана мен бала денсаулығын жақсарту басты назарда болуы қажет. Бұл бағытта мемлекет тарапынан арнайы бағдарламалар іске қосылып, жан-жақты қолдау шаралары жүргізілуде. Аталған орталық өңірдегі аяғы ауыр әйелдер мен кішкентай бүлдіршіндері бар отбасылардың денсаулығын, әл-ауқатын жақсартуға оң септігін тигізеді. Басқарма басшысының айтуынша, ана мен бала өлімі көрсеткіші өткен жылдармен салыстырғанда әлдеқайда төмендеген. Өлім-жітімнің алдын алу мақсатында үздіксіз сараптамалар жүргізіліп, жүктілік пен босанудың қауіпсіз технологиялары жетілдірілуде.
Майра Асанова, Түркістан қаласының тұрғыны:
— Бүгінде балаларымыздың ауруына байланысты жылына бір рет Нұр-Сұлтан мен Алматы қалаларына жолдамамен барып, ем алады. Жолдың ұзақтығы мен қаражаттың жетіспеушілігіне байланысты көптеген науқас балаларымыз үлкен қалаларға барып келе алмайды. Сондықтан облыс орталығынан балалар орталығы ашылса нұр үстіне нұр болары сөзсіз. Тұрғындардың денсаулығы мен әлеуметтік жағдайын жақсарту бағытында ауқымды жұмыстар атқарып жатқан билікке алғыстан басқа айтарымыз жоқ.
