Түркістан облысы халқының саны ең тығыз орналасқан өңір саналады. Демографиялық өсім көрсеткіші өте жоғары аймақта медецина мамандарының тапшылығын жою мәселесі де маңызды. Осыған орай, Қазақстан Республикасы Денсаулық сақтау министрі Ажар Ғиният Түркістан облысына жасаған жұмыс сапарында халықпен кездесіп, Түркістан облысының басшылығымен мәселені шешуд бағытында атқарылып жатқан жұмыстарға тоқталды.
— Жыл сайын жүздеген дәрігер сіздің облысқа, жақын отырған бұрын облыс орталығы болған Шымкентке де 150-ден астам дәрігерлер келеді. Енді сол жас мамандарды баулып, елге сіңіп кетуі үшін көмектесу керек. Ол жергілікті атқарушы органдардың жұмысы болып табылады, — деді Ажар Ғиният.
Айта кету керек, Түркістан облысында 6 мың штаттық бірлік бар, соның ішінде 4,5 мыңы практик дәрігерлер. Оларға әлеуметтік қолдау көрсету бағытында тиісті жұмыстар атқарылып келеді. Мамандардың жетіспеушілігі мәселесін шешу бағытында өткен жылы жоғары оқу орындарының 129 түлегі медициналық мекемелерге жұмысқа жіберілді. Оның ішінде шалғай ауылдарда жұмыс істеуге ниет білдірген 43 жас маманға 1 500 000 теңге сомасында әлеуметтік және қаржылық көмек көрсетілді. Ауыл-аймаққа келген білікті мамандар баспанамен қамтылып, коммуналдық шығындарға жеңілдіктер қарастырылып келеді. Сонымен қатар, 2021 жылы 2 809-дан астам медицина қызметкері біліктілігін арттырды,оның ішінде 110-ы шетелде АҚШ,Түркия, Ресей секілді медецина саласы дамыған елдерде оқыды.
Айта кетейік, мемлекеттік бағдарламалар аясында өңірде медицина саласында жүйелі жұмыстар атқарылып келеді. Жаңа нысандар салынып, дәрігерлердің біліктілігін арттыру мен цифрландыру, жедел жәрдем көліктерімен қамту жұмыстары өз ретімен жүзеге асырылуда. Алдағы уақытта да аймаққа министрлік және жергілікті әкімдік тарапынан көп көңіл бөлініп, аталған саланың одан әрі дамып, өркендеуіне жағдай жасалмақ.
