Түркістанда салынған медициналық жедел жәрдем орталығы жаңа заман талаптарына сай жабдықталып, 100 пайыз цифрлық жүйеге қосылған. Құрамында 25 дәрігерлік және фельдшерлік бригада бар шұғыл көмек станциясы жылына 70 мың шақыруға қызмет көрсетуге дайын. «Қазақстандық-Француздық «КАТКО» бірлескен кәсіпорны» ЖШС демеушілігімен бой көтерген медициналық станцияға жуырда ҚР Денсаулық сақтау министрі Ажар Ғиният пен облыс әкімі Өмірзақ Шөкеев арнайы барып, жұмысымен танысты.
Заманауи үлгіде жасақталған орталықта жедел жәрдем автокөліктері шақыртуларға дер кезінде медициналық көмек көрсету үшін дефибриллятор, кардиостимулятор, кардиоверсия, кардиомонитор, электрокардиограф, ИВЛ аппараттарымен, оттегімен және электрлік, механикалық сорғыш аппараттарымен қамтылған. Жедел жәрдем станциясы жылына 70 000 — ға жуық шақыруға шыға алады. Нысанға 1,4 млрд теңге инвестициаланған.
— Түркістан облысында медицина саласында істеліп жатқан жұмыстар жеткілікті. Жаңа нысандар салынып, дәрігерлердің біліктілігін арттырып, цифрландыру, жедел жәрдем көліктерімен қамту жұмыстары өз ретімен жүргізіліп келеді. Бұл, өз кезегінде, өңіріміздегі аталған саланың одан әрі дамып, өркендеуіне жол ашады деп білемін. Жаңа жедел жәрдем станциясына инвестиция салған «Қазақстандық-Француздық «КАТКО» бірлескен кәсіпорнына» ризашылығымызды білдіреміз. Түркістанда халықаралық стандарттарға сай заманауи емдеу орталықтары жұмыс істейтін болады, — деді Өмірзақ Шөкеев.
Жедел жәрдем стансасы 4 категориялық санат бойынша «алтын сағат» қағидасына сай жұмыс істейді. Орталықта сондай-ақ АҚШ-та біліктілігін арттырған облыс мамандары қызмет көрсетеді. Жалпы облыс бойынша 140 жедел мед
ициналық жәрдем бригадалары шақыртуларға қызмет атқарады. Өңір қажеттілігі 96 пайызға қамтылған. Облыста жедел жәрдем қызметінің кластері құрылып, ауылдық және қалалық жедел жәрдем қызметтері орталықтандырылған. Нәтижесінде науқастарға жету уақыты барынша азайып, қызмет көрсеру сапасы айтарлықтай артты.
Түркістан қаласында медицина саласын дамытуға күш салынуда. Ерекше жобаның бірі ретінде Біріккен Араб Әмірліктерінің қолдауымен іргесі қаланып жатқан «Ана мен бала орталығының» құрылысын айтуға болады.
