Отырар аудандық орталық ауруханасының бас дәрігері Еркін Нұрлыхановтың ұйытқы болуымен емхананың клиникалық диагностикалық бөлімі заманауи технологиямен жабдықталып, арнайы зертхана аппараттарымен толықты.
Аудан тұрғындарына тынбай қызмет көрсетіп келе жатқан зертхананың негізгі жұмысына стационарлық, шұғыл қызмет және емхананы қамту жұмыстары кіреді. Камшат Елтаева басшылық жасайтын бұл бөлімде биохимия, кооулограмма, жалпы зәр және нәжіс талдау анализдері, гепатит В,С, қанның және резус-фактордың тобы және онкоцитологиялық сынды 20 дан аса зерттеулер алынады. Айына жаңа туған сәбиден бастап 4000 –ға жуық тұрғын тиісті талдау тапсырса, жүйелі талдау жүргізу нәтижесінде 400-600 тұрғыннан түрлі аурулардың түрлері анықталған. Дәрігерлер скринингтік тексеруге қосылған гепатит В,С талдауының ауқымды жүргізілуінің арқасында, жастар арасында гепатит ауруының көбейгенін айтып дабыл қағуда.
Жақында аталған бөлімнің биохимиялық зерттеу кабинетіне көрсетілетін қызметтер мен зертханалық жұмыстардың сапасын жақсарту мақсатында жаңа қан талдау аппараттары әкелініп, іске қосылды. Ақ халаттыларымыздың жұмысын едәуір жеңілдеткен су жаңа биохимиялық аппарат «MINDRAY-240» деп аталады. Аталған аппарат еліміздің үлкен облыстарында орнатылған. Бұдан бұрын қолданыста болған «MINDRAY -220» аппараты 3 сағатта 40 адамның анализін сараптаудан өткізсе, «MINDRAY -240» аппараты 2 сағатта 50 адамның талдау нәтижесін дайындайды. Бөлімнің дәрігер лаборанты Мағжан Партаевтың айтуынша аппаратсыз қол әдісімен зертханалық талдаулар жасағанда уақыт көп кетсе, бұл аппарат адамның анализін 15 минутта автоматты түрде анықтап, дайындайды. Қант мөлшері, холестерин, бауыр-өт, бүйрек, жүрек жүйелерінің жұмыс істеу нәтижелерін, сонымен қатар зәр талдау әдісі арқылы бауыр мен бүйректің ауруларын да анықтай алады екен.
Жаңадан әкелінген аппараттың тағы бірі Американдық «Гематологиялық микросс 25». Бұл аппараттың ерекшелігі адам қанының 23 элементін тексеруге мүмкіндік береді. Қандағы вирустарды тексеру арқылы лейкоз сынды ауруларды ерте анықтауға мүмкіндік береді. Егерде науқасқа жедел ота жасалыну керек болса, дер кезінде науқастың қанын талдауға таптырмас аппарат.
Сонымен қатар адам қанындағы калий, кальций, натрий, хлор, лактат сынды тағы басқа электролиттерді, қан тамырдағы қышқылды-сілтілі жағдайын анықтауға арналған КЩС автоматты аппараты да іске қосылды.
Бұл бөлімде жұмыс өтілі қырық жылға жуықтаған Гепатит В,С лаборанты Нышанкүл Бегімбетова, отыз жыл биохимия лаборанты болған Баян Төлегенова, жиырма бес жыл жалпы талдау лаборанты Қанткүл Дүйсе сынды 15 ке жуық тәжірбиелі мамандар қызмет атқарады. Зертхана мамандары жыл сайын өз біліктіліктерін арттыру мақсатында арнайы даярлықтан өтіп отырады. Алдағы уақытта бұл бөлімді тағы да жаңа заманауи құрылғылармен толықтыру жоспарда бар.
Шолпан ДҮТБАЕВА,
Түркістан облысы,
Отырар ауданы.
