Шымкент қаласының әкімі Мұрат Әйтенов Президентіміздің Жолдаудағы тапсырмасына сай қаладағы коронавируспен күресте қалалық аудандар әкімдеріне инфекцияның таралуының алдын алу, қала аумағында карантиндік шектеу шараларының сақталуын күшейту жөнінде арнайы тапсырма берді.Үшінші мегаполис әкімінің тапсырмасын орындауға аудан әкімдері бас болып барлық күштерін жұмылдыруда.
Бүгін Қаратау ауданы әкімі А.Әліқұлов ауданда құрылған мобильді топпен бірге аудандағы кәсіпкерлік нысандарын аралап, Шымкент қаласының бас санитариялық дәрігері қаулысының талаптарын қатаң сақтау қажеттігін түсіндірді.
Кезекті мониторинг жұмыстары барысында аудан басшысы нысан иелері мен қызметкерлеріне күнделікті санитарлық талаптарды және қаулыда көзделген тапсырмаларды бұлжытпай орындауды тапсырды.
Жалпы, Қаратау ауданының аумағында 1039 кәсіпкерлік нысан бар. Қаратау ауданы аумағында 10 мобильді топ құрылып, карантин талаптарын сақтау туралы тұрақты түрде түсіндіру жұмыстары жүргізілуде.
Аталған аудан аумағында 2021 жылдың қаңтар-шілде айлары аралығында мобильдік топ жалпы карантин талаптарын сақтамаған 522 нысанды анықтап, тиісті шара қарастыру үшін Қаратау аудандық тауарлар мен көрсетілетін қызметтердің сапасы мен қауіпсіздігін бақылау басқармасына жолдаған болатын.
