Президент айтқандай қарапайым азаматтардың күнделікті өмірі мен тіршілігін жайлы етуге бағытталған жұмыстар Шымкент қаласында үздіксіз жүргізіліп келеді. Қазіргі кезде шымқалалықтардың қыс ауасында жылы баспанада, жылы сумен қамтылуын жүзеге асыру үшін қысқы жылыту маусымына дайындық жұмыстары қарқынды жүргізілуде.
Шымкент қаласының әкімі Мұрат Әйтенов ведомстволық ұйымдары бар басқарма басшыларының, аудан әкімдерінің және коммуналдық қызметтер ұсынушы ұйымдар өкілдерінің қатысуымен жылыту маусымына дайындық мәселесін талқылады.
Қалалық энергетика және коммуналдық шаруашылық басқармасының басшысы Б. Болатбеков берген ақпарға сәйкес, 28 шілдедегі ахуал бойынша, қаланың негізгі жылу беретін кәсіпорны — №3 знергоорталықта дайындық жұмыстары қызу жүргізілуде. Резервтік сұйық отын қоры 98 пайызға дайындалған.
Жиынға қатысқан кәсіпорын өкілі жоспарланған жұмыстарды атқаруға қосымша жұмысшылар тартылғанын, құбырлар толығымен алынып, жеткізілгенін атап өтіп, барлық жұмыстар қыркүйек айының басында аяқталады деп мәлімдеді.
Қаладағы 419 шақырымнан асатын жылу жүйелері қысымдаудан өткізіліп, орын алған техникалық ақауларды қалпына келтіру жұмыстары жоспарлы мерзім ішінде атқарылуда. Сала мамандары жылу қазандықтары мен сорғы станцияларының барлығы бір ай мерзім ішінде толық дайындықта болады деп есеп берді.
Қала әкімі басқарма басшылары мен аудан әкімдерінен осы бағытта атқарып жатқан жұмыстарының есебін алып, дайындық жұмыстарының көрсеткіштерін арттыру жөнінде талап қойды. Метрологялық болжамдарға сәйкес, биылғы қыс аязды болатынын ескерткен қала басшысы, дайындық жұмыстары жоспарға сәйкес мерзімдерінде әрі сапалы орындалуы тиіс деді.