Мемлекет басшысы Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты биылғы жылға арнаған Жолдауында қазақстандықтарды жаңа қалыптасқан жағдайда бірлік пен ынтымақта болып, заңдылықтарды сақтау мен жауапкершілікті сезінуге, қоғамдағы қиын да күрделі кезеңде қоғамдық келісімді бұзбауға, құқықбұзушылыққа бармауға, бұл сыннан билік пен халық болып бірлесіп шығуға шақырды.
Дегенмен «Сақтансаң сақтармын» дегендей қоғамдағы тыныштық пен түсіністікті үнемі қадағалап, оны бұзуға ілік болатын себептердің, салдарлардың алдын алу жергілікті биліктің басты міндеттерінің бірі.
Сондықтан да, Шымкент қалалық Полиция департаментінің қызметкерлері үстіміздегі жылдың 21 шілдесінен бастап «Қару» жедел-профилактикалық іс-шараны бастаған болатын. Бұл іс-шараның мақсаты – қоғамдағы құқық бұзушылықтың, атыс қаруын қолданып жасалатын қылмыстардың алдын алу. Қаланың барлық аудандарындағы құқық қорғау органдары бұл іс-шараны белсенді өткізуде.
Мегаполистің Абай ауданының аумағында жүргізілген осы ауданда тіркелген 193 қарудың иелерін тексеру жұмыстарының нәтижесінде 8 заңдылықты сақтамау фактісі кездесті. Олардың ішінде алтауы әкімшілік құқық бұзушылық болса, оның бесеуінде қаруын тіркетудегі ереже бұзушылықтар. Енді бірінде қаруды сақтау талаптары сақталмаған. Сол сияқты екі жағдайда қаруды заңсыз сақтау фактілері анықталды.
«Қару» жедел-профилактикалық іс-шарасы тамыз айының 20-сына дейін жалғасады. Құқық қорғаушылар қоғамдағы келісім мен тыныштықты сақтау, заңсыз сақталған қарумен қылмыс жасалынуының жолын кесу мақсатында қырағылықпен жұмыс жүргізе бермек.
