Қазақстан Республикасының Президенті Қ.К.Тоқаев еліміздің болашағы жастар болғандықтан Мемлекеттік жастар саясатына ерекше көңіл бөліп отырады. Оның ішінде жастарды жұмыспен қамту, нарықтағы сұранысқа ие мамандықтарға қайта даярлау, жеке ісін ашуға жәрдем беру сияқты мәселелер жергілікті әкімдіктерде назардан тыс қалған емес. Мемлекеттік бағдарламаларға сәйкес жұмыспен қамтудың бірнеше жолдары жүзеге асырылып келеді. Солардың бірі – «Еңбек» мемлекеттік бағдарламасы. Осы мемлекеттік бағдарламаның ІІ бағыты аясында Мемелекеттен қолдау тапқан қала тұрғаны – Сауле Абдукадирова,-деп хабарлайды «Newqazaq.kz» ақпараттық порталы қала әкімінің баспасөз қызметіне сілтеме жасап.
Ол былтырғы жылдың шілде айында «Атамекен» палатасы жанындағы «Бизнес бастау» курсына қатысып, қолына сертификат алған соң, мемлекеттік грантқа «Шаштараз ісі» бойынша комиссияға өз бизнес-жоспарын ұсынған. Нәтижесінде жобасы мақұлданып, 200 АЕК(555 650 тг) көлемінде грантқа қол жеткізді. Бөлінген қаражатқа керекті құрал жабдықтарын алып, қазіргі таңда тұрақты түрде қызмет көрсетуде.
– Жалпы бұл бағдарлама кәсіппен айналысамын деген жергілікті тұрғындар үшін үлкен мүмкіндік. Мемлекеттік қолдаудың арқасында өз кәсібімді ашып, қазіргі таңда 50-ге жуық шәкірт тәрбиелеудемін – дейді Сауле Абдукадирова.
Одан шаштараздық кәсіптің қыры мен сырын үйреніп, мамандықты жетік меңгеріп алған соң ол жастар да мемлекеттік бағдарламалар аясында төмен пайызды несие немесе тегін гранттар ұтып алып өз істерін ашуға мүмкіндік алатын болады.
Жалпы, Шымкентте былтыр 4828 адам мемлекеттік грантқа қол жеткізді. Оның ішінде 407-сі көп балалы отбасы мүшелеріне, 2122 -аз қамтамасыз етілген отбасыларға, 29-мүгедек азаматтарға ,1075-сі жастарға және 1195 өзге санаттағыларға берілді. Биыл 600 азамат грантқа қол жеткізіп, өз мүмкіндіктерін жүзеге асыруда.
