Мемлекет басшысы Қасым-Жомарт Тоқаевтың биылғы жылға арнаған Жолдауында әлемде жаңа жағдай қалыптасып келе жатқанын, пандемия адамдардың, мемлекеттердің қалыпты өміріне көптеген қзгерістер енгізуді, жаңаша жұмыс істеп, жаңаша өмір сүруді қажет ететінін айта келіп, мемлекеттің болашағы мықты болуы үшін оның азаматтары үлкен-кіші демей денсаулығын шыңдауы, ол үшін жаппай бұқаралық спортпен шұғылдануды әдетке айналдыру керек,-деген болатын. Президенттің барлық жастағы ел азаматтары арасында бұқаралық спортты дамыту жөніндегі тапсырмасына сәйкес миллионнан астам тұрғыны бар Шымкент қаласында биыл көптеген нақты жұмыстар атқарылуда. Көпқабатты тұрғын үйлер аулалары мен шалғай тұрғын алаптарға балалар алаңшаларын, спорттық алаңшаларды көптеп салу жүзеге асырылуда.
Мегаполистегі Еңбекші ауданының Қарабастау тұрғын алабында спорт алаңшасы салынуда. Спорт нысаны «Шымкент қайырымды қала» әлеуметтік қоры арқылы демеушілік есебінен құрылуда.
Аудан әкімі Д.Есілбек Бойыт ата көшесінің бойында салынып жатқан ашық спорт алаңшасының құрылысымен танысты. Жергілікті тұрғындармен кездесіп, ұсыныс-пікірлерін тыңдады. Сондай-ақ алдағы уақытта атқарылатын жұмыстарға тоқталып, жоспарлармен таныстырды. Тұрғын алапта инфрақұрылым мәселелері біртіндеп шешілуімен қатар тұрғындардың болашақта жайлы өмір сүруіне қол жеткізу үшін мақсатты да жоспарлы жұмыстар атқарылатын болады. Оның ішінде, тұрғындар демалатын, серуендейтін орындар, балалардың ойын алаңджары мен спорт алаңшалары да қамтылады. Сөйтіп, балалар мен жасөспірімдерден бастап барлық тұрғындардың бұқаралық спротпен шұғылданып салауатты өмір сүруіне мүмкіндіктер жасалатын болады.