Мемлекет басшысы Қ.Тоқаев өзінің биылғы жылға арнаған Жолдауында әлемдік пандемиямен күреске көп көңіл бөліп, індеттің алғашқы жылы тәжірибесіздіктен жіберілген кемшіліктерді болдырмай, азаматтардың денсаулығы мен емделуі, індеттен сақтану мәселелеріне жергілікті әкімдіктің жіті көңіл бөлуін тапсырды.
Үшінші мегаполисте пандемиямен күресте қыруар іс атқарылуда. Індетке қарсы вакцина салуда қала бірінші орында келеді. Ауыра қалғандарға арналған төсек-орын саны мен маман медперсонал жеткілікті. Жедел медициналық жәрдем қызмет де сай.
Шымкент қаласының әкімі Мұрат Әйтенов қаладағы эпидахуалдың нашарлауына байланысты барлық жағдайды жіті назарда ұстауда.
«Жедел медициналық жәрдем көрсету» стансасының 112 Call-орталығына бір тәулік ішінде 2100 шақырту түсуде. Мұнда тәулік бойы 30 диспетчер қызмет етеді.
Таяуда сол Орталық жұмысының дайындығын пысықтау барысында барып көзімен көрген қала басшысы науқастарды жедел қабылдау және емдік шараларды тез арада жүргізу процесін оңтайландыруды және қателікке жол берілмеуі тиіс екенін атап өткен еді. Сонымен қатар, пандемияға байланысты құрылған штабтың жұмысын күшейтуді тапсырған. Қазіргі қала «қызық аймаққа» кіріп, ахуал қиындай түскен кезде Орталық жұмысының ширатылуы көп жағдайды жеңілдетуде.
Мұндағы ерекшелік – орталық келіп түскен қоңырауларды басқаруда PRI арнасындағы үздіксіз режимдегі байланыс желісі және спутниктен бақыланатын жүйе мен мобайл интернет пайдаланылады. Операторлар небәрі 10 секунд ішінде бригадаға шақырту туралы хабар жібереді. Мұнымен қатар, осынау ақпарат жүйесі арқылы Шымкент қаласы картасынан мекенжайларды іздеп, көлік қозғалысын қадағалап, жылдамдығын, күту уақытын және тағы басқа операцияларын автоматты түрде бақылай алады.
