Президенті Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты Жолдауында мемлекетіміз бен халқымыздың әлемдегі жаңа жағдайға бейімделіп, жаңаша іс-қимылға көшуі керектігін баса айтты. Оның ішінде ауыл шаруашылығы саласына да ерекше тоқталды. Ол: «Ауыл шаруашылығын дамытпай, бәсекеге қабілетті экономика құру мүмкін емес. Бұл салада шешімін таппай келе жатқан өзекті мәселелер бар. Атап айтқанда, жұрттың жерге қол жеткізе алмауы, ұзақ мерзімге берілетін «арзан несиенің» болмауы, кәсіби мамандардың тапшылығы. Өнімділікті арттырып, шикізат өндірумен ғана шектелмеу үшін, сондай-ақ қойма және көлік инфрақұрылымын дамыту мақсатында шұғыл шаралар қабылдау керек. Елімізде ет, жеміс-жидек, көкөніс, қант, бидай, майлы дақылдар, сүт өнімдерін өндіру және өңдеу үшін 7 ірі экожүйе қалыптастыруға болады» дей келіп, балық шаруашылығына да ерекше мән беруді, қосымша құн қалыптастырудың өзегі саналатын ірі жобалар маңызды рөл атқаруы тиістігін, вертикальді кооперация аясында жеке қосалқы шаруашылықтың әлеуетін пайдаланған абзал екенін айтты.
Жеке шаруашылық миллиондаған ауыл тұрғындарына табыс табуға, отбасымен қоса ауылдастарын да жұмыспен қамтуға мүмкіндік береді. Оларды өңірлік азық-түлік хабтарын құруға жұмылдыру керек. Горизонтальді кооперацияның әлеуетінсіз агроөнеркәсіп кешенінде қарқынды даму болмайды. Басы бірікпеген жеке қосалқы шаруашылықтар, шын мәнінде, өлместің күнін көріп отыр. Бұл ретте, сапалы әрі мол өнім өндіру, үздіксіз тауар жеткізу туралы сөз қозғаудың өзі орынсыз. Бәсекеге қабілетсіздік пен импорттан арыла алмай отыруымыздың себебі де осыда. Кооперация кезінде жер және басқа да мүлікке қатысты барлық құқықтар сақталады. Кооперация шаруашылықтарға шикізат сатып алу, өнім өндіру және оны сатуды ұйымдастыру барысында күш жұмылдыруға мүмкіндік беретінін айтып, соны іске асыруды жүктеді.
Ауыл еңбеккерлерінің ауыр жұмысы тым арзан бағаланып, табыстың басым бөлігіне алыпсатарлар кенеліп жатқандықтан, субсидия және салық жеңілдіктерін беру бағдарламалары аясында ауылдық жерлердегі кооперацияны ынталандыру үшін тиісті шаралар топтамасын әзірлеу қажет, дегені ауылдықтардың көңілінен шықты.
Мемлекет басшысының «Жеріміз шетелдіктерге сатылмайды. Бірақ, Үкімет ауыл шаруашылығы жерлерін толыққанды экономикалық айналымға енгізудің өзге әдіс-тәсілдерін әзірлеуге тиіс. Аграрлық секторға инвестиция тарту ауадай қажет. Кәсіби мамандардың тапшылығы, сондай-ақ аграрлық ғылымның ойдағыдай дамымауы – бұл саладағы қордаланған мәселелер. Осы бағытта атқарушы билік тарапынан нақты шаралар қабылдануы керек. Технологиялық тұрғыдан ескірген суару жүйесі үлкен кедергі келтіріп отыр. Судың 40 пайызы далаға кетіп жататын кездері болады. Онсыз да су тапшылығының зардабын тартып отырған еліміз бұған жол бере алмайды. Осы саланың нормативтік-құқықтық тұрғыдан реттелуін қамтамасыз етіп, заманауи технологиялар мен инновацияны енгізу үшін экономикалық ынталандыру шараларын әзірлеу қажет, дегені жұртшылықтың көңілінен шықты.
Ауылдықтар еліміздің басшысының ауылды дамытпай мемлекетіміздің де қарқынды дамымайтынын айтып, ауыл шаруашылығын дамытудың негізгі бағыттарын белгілеп бергенін қуана құптады. Ауыл әкімдерін тұрғындар өзі сайлайтындығы да ауылдағы тіршілікке үлкен серпін беретіні анық.
Президентіміз «Ауыл – ел бесігі» бағдарламасындағы тұрғын үй мәселесін шешу жолдарын айта келе, жұмыс жасап жүрген азаматтар мен азаматшалар зейнет қорында жиналған қаржының бөлігін қолдана алатындығын, бүгінгі таңда көп балалы аналарға, мүгедектерге арендалық үй салуды көбейту керектігін атап өтті. Ауылды жерде ірі кəсіпкерлерге төмен төлемді жер үй салуды қолға алуды ұсынуы азаматтардың ауылда тұрақтап қалуына, жастардың туған ауылдарына барып еңбек етуіне әсер етпек.
