ҚР Президенті Қасым-Жомарт Тоқаевтың жолдауын толығымен тыңдадым. Он бір бөлімнен тұратын мемлекеттің алдағы болашаққа арналған жоспары əрине, көңілге үміт сыйлағаны рас. Үлкендерді мазалайтын халықтың əлеуметтік жағдайы, болашақ ұрпақтың ертеңі, сонымен бірге жер, тіл мәселесі екені айдан анық.
Президентіміз «Ауыл – ел бесігі» бағдарламасындағы тұрғын үй мәселесін шешу жолдарын айта келе, жұмыс жасап жүрген азаматтар мен азаматшалар зейнет қорында жиналған қаржының бөлігін қолдана алатындығын, бүгінгі таңда көп балалы аналарға, мүгедектерге арендалық үй салуды көбейту керектігін атап өтті. Маған ұнағаны ауылды жерде ірі кəсіпкерлерге төмен төлемді жер үй салуды қолға алуды ұсынғаны.
Қоғам болып интернет бетінен тұрмай қалған жастарымызды еңбекке баулу, спорттық үйірмелер, клубтар ұйымдастыруды, қол жетімді сапалы білім, онлайн оқу жүйесін жөнге келтіру, елді-мекендегі дәрігерлік фельдшерлік мекемелердің халыққа қызмет көрсетуін жергілікті басшылыққа жүктеді.
Ауыл əкімдерін болашақта халық өзі сайлап ала алатындығын дұрыс шешім деп білемін. Енді міне, Президентіміздің бастамасымен ауыл әкімдерін сайлау өтпек.
Болашақ ел сайлар әкімдерге қояр талабы да орынды. Жасы 25-ке толған, мемлекеттік қызмет саласында тәжірибесі бар, сыбайластық жемқорлықтан аулақ жан болу керек деп айқындап берген.
Сонымен бірге еліміздегі белең алған жемқорлықпен күресті талдай келе жалғыз ғана ішкі істер мекемесінің қызметкерлері ғана емес, өзін ҚР-ның азаматымын деген кісіде өзінің үлесін қоса алатындығын айтып өтті. Адам құқығының аяққа басылмауын, қатаң ретімен заңға сəйкестендіре отырып шешілетін əр іске мұқият қарауларын, сонымен бірге сотқа барған əр істерде шикіліктің көп екенін, сот шешімін аяқ астында шығара салатындарын қадап айтты. 2021 жылдан бастап қос азаматтығы бар қызметкер жұмыстан босатылатыны туралы айтып өтті. Еліміздегі адам саудасының көлеңкелі жағын ашу жұмысын жолға қою мақсатында қоғамдық келісім кеңесінің, көмегіне жүгіну керектігін, сонымен бірге саяси реформаларға халықты қатынастыру керектігін айтып өтті.
Білімсіздік, популизм қазақтың басты дауы деді, Президент. Сөз соңында Ахмет Байтұрсыновтың: білімді болу үшін, білім керек, ақылды болу үшін, оқу керек, күшті болу үшін, ауызбіршілік керек деген дана тілегімен аяқтады.
Иə, алға қойған Президентіміздің мақсаты көп. Сол ірі, халық игілігі үшін құрылған жоспарларының орындалуына өз қара басым шын жүректен тілектеспін.
Ғазиза БАЙСЕЙТОВА,
Шымкент қалалық
саяси қуғын-сүргін құрбандары музейінің қызметкері.
