Былтырғы жылдан бері короновирус індеті әлемді жайлап, елімізде де төтенше жағдай, карантиндік шектеулер енгізіліп, алғашқы айларда халық қана емес, биліктегілер де тосыннан келген кеселден абдырап қалған еді.
Бірақ, біртіндеп Президенттің қатаң қадағалауы мен бағыт-бағдар беруінен жағдай түзеліп келеді. Дегенмен, халық арасында бас санитардың талаптарын елемей, қауіпсіздік ережелерін бұзушылар азаймай отыр. Сондықтан да, Шымкент қаласының аудан аумақтарында карантиндік талаптардың сақталуына мониторинг жұмыстары тұрақты атқарылуда.
Осындай кезекті рейд барысында Абай ауданы бойынша мобильдік топ мониторинг барысында «Олжа» және «Екі шал» дәмханаларында туған күн іс-шарасының өтіп жатқанын анықтады. Нәтижесінде іс-шара тоқтатылды.
Ал өткен тәулікте Шымкент қаласында 303 нысанға тексеру жұмыстары жүргізілді. Оның ішінде 23 нысанда карантин режимінің талаптары бұзылғандығы анықталып, әкімшілік хаттамалар толтырылды. Мұндай рейдтер мегаполистің барлық аудандарында да жоспарлы түрде тоқтаусыз жүргізіліп келеді. Шымқалалықтардың басым бөлігі жүргізілген түсіндіру жұмыстары мен карантин талаптарын ұғынып, сақтық шараларын күшейткенімен кейбір жауапсыздардың кесірінен басқаларға да кесел жұғуы тоқтамауда.
Сондықтан әркім өзі мен отбасы үшін жауапкершілікті ұстанып, санитарлық талаптарды толық орындаса ғана бірлесіп індетті жеңіп шыға алатынымызды ұмытпайық. Короновирусты жеңудің басты жолы – вакцина салдырып екпе алу екенін естен шығармаған абзал.
