Президенттің төрағалығымен өткен Үкіметтің кеңейтілген отырысында Шымкент қаласының әкімі Мұрат Әйтенов өзі басқарып отырған миллиондық қаладағы бұқаралық спорт инфрақұрылымдарын дамытудың жағдайы жөнінде де айтып берді.
«Жолдауыңызда жастарды спортқа көптеп баулу мәселесін айтқан болатынсыз. Қалада 890 спорт нысаны бар. Бұқаралық спортпен тұрғындардың 31 пайызы қамтылған. Биыл қаланың шалғай елді мекендерінде 115 әмбебап спорт алаңшалары салынады. 4 мыңнан астам бала спорт үйірмелерімен қамтылады»,-деді әкім.
Бұдан бөлек, қаладағы көп қабатты тұрғын үйлер бойынша 101 аула жаңартылады. Нәтижесінде көрсеткіш 80 пайызға жететін болады. Қала басшысы бұл бағыттағы жұмыстардың жалғасатынын атап өтті.
Жалпы еліміздегі үшінші мегаполис кәсіби спорт түрлерінен де, бұқаралық спорттан да еліміз бойынша алдыңғы қатардан көрініп жүрген спорттық қалалардың қатарында. Шымқала спортшылары Токио олимпиадасына онбір жолдама жеңіп алды. Жыл басынан бері көптеген спортшылар әлемдік, халықаралық, азиялық спорт бәсекелерінен жеңімпаз, жүлдегер болып оралуда.
Спортшылары ел даңқын шығарып жатқан қалада көпшілік, әсіресе, жасөспірімдер бұқаралық спортқа құмартуда. Соның арқасында спортпен шұғылданушылар, көше, саябақтарда жаяу серуендеп, не жүгіріп денсаулығын нығайтушылар қатары күн санап артып келеді. Жұртшылықтың бұқаралық спорт түрлеріне бетбұрысына қарай қала әкімдігі де балалар спорт кешендері, ашық спорт алаңшалары, жаяу не жүгіру жолдары, саябақ, гүлзар және басқа қолайлы орындарда адамдардың дене шынықтыру, гимнастикалық жаттығулар жасауына ыңғайла орындар жасауда. Бір сөзбен айтқанда қалада бұқаралық инфрақұрылым қарқынды қалыптасуда.
