Балалар – болашағымыз. Жас ұрпақтың лайықты болып өсуіне отбасы, ата-анасымен бірге мемлекет те көп көңіл бөледі. Әсіресе, ата-анасынсыз көңілі жарым, өмірге өкпелі жетім балалар өздеріне арнайы көңіл бөлуге аса мұқтаж. Олардың болашақта қандай азамат болуы да сол өздеріне деген ересектердің көңіл бөлуі мен қамқорлығына да байланысты. Мұны әсіресе, құқық орғау органдарының қызметкерлері жақсы түсінеді. Өйткені балалар үйінде тәрбиеленушілер ақыл-кеңес берер ата-анасыз теріс жолға тез түсіп, бұзақының ықпалына тез еріп кетуі мүмкін. Ондайлар кейін полицияның бас ауруына айналып, қоғам тыныштығын бұзып, қылмыстар жасап, тәртіп сақшыларын жұмысты етеді.
Сондықтан да болар, Қазақстан полициясы күніне орай, Шымкент қаласы Полиция департаментінің бастығы полиция генерал-майоры Ералы Жумаханбетовтың бастамасымен департаменттің жеке құрамы №4 балалар үйінің тәрбиеленушілеріне ұмытылмас жазғы демалыс ұйымдастырды.
Полиция қызметкерлері «Машат» сауықтыру лагерінде демалыс күндерін өткізіп жүрген балаларға күні бойы көтеріңкі көңіл-күй сыйлады.
Іс-шара барысында полицейлер балаларға арнайы қызметтік даярлығын көрсетіп, концерттік бағдарлама мен қуыршықтар театрының қойылымын ұсынды. Сондай-ақ олар үшін футбол, волейбол спорт түрлерінен жарыстар ұйымдастырылып, жеңімпаздарға алғыс хаттар мен сыйлықтар табысталды.
Өз кезегінде балалар үйінің тәрбиеленушілері арнайы дайындаған мерекелік концерт қойды. Балалар ән айтып, би билеп, өнерлерін көрсетті. Сонымен қатар балаларға балмұздақтар үлестіріліп, мерекелік дастарқан жайылды.
Осы іс-шарада №4 балалар үйінің 2 тәрбиеленушісіне ҚР ІІМ Б.Бейсенов атындағы Қарағанды академиясына оқуға түсуге жолдама берілді.
Бұл шараның мақсаты – балаларға қуаныш сыйлап, оларға қолдау көрсету болып табылады.
Тәртіп сақшыларының осындай жылы лебізіне дән риза болған №4 балалар үйінің тәрбиеленушілері ішкі істер органдарының қызметкерлерін төл мерекелерімен құттықтап, еңбектеріне табыс тіледі. Бір күн болса да өздеріне сонша көңіл бөліп, мол қуаныш сыйлаған генерал бастаған полиция қызметкерлеріне балалар дән риза болды.
Міне, жас ұрпақ тәрбиесінде мемлекеттік жастар саясатын нақты іспен қолдаудың көрінісі.
