Құрметті отандастар! Ардақты ағайын, Шымкент қаласының тұрғындары мен меймандары!
25 қазан – Қазақстан Республикасының тарихындағы айрықша маңызға ие, елдігімізді айқындап, тәуелсіздікке бастар даңғыл жолды ашқан тағылымды ұлы күн. Бұл мереке – мемлекеттігіміздің іргетасын нығайтқан тарихи шешімнің, азаттыққа деген асқақ ұмтылыстың және ортақ болашаққа деген мұқалмас сенімнің жарқын символы.
Республика күні – халқымыздың азаттық жолындағы тарихи таңдауы мен мемлекеттілік мұратын дәріптейтін айтулы ұлттық мереке. Бұл күн егемен елдігімізді бағалап, тәуелсіздігімізді одан әрі нығайтуға және келешекке деген сенімімізді арттыруға үндейді. 1990 жылы қабылданған Декларация мемлекетіміздің саяси-құқықтық негізін қалап, еліміздегі әрбір азаматтың теңдігі мен еркіндігіне кепілдік берді.
Бүгінде Қазақстан – жүзден астам түрлі этнос өкілдері бір шаңырақ астында тату-тәтті, берекелі өмір сүріп, ортақ мақсат жолында еңбек етіп келе жатқан ынтымағы жарасқан біртұтас мемлекет. Біздің басты әрі баға жетпес байлығымыз – бейбітшілік, тұрақтылық, өзара құрмет, бауырластық мен қоғамдық келісім. Бұл құндылықтар елдің орнықты дамуының негізі ғана емес, келер ұрпаққа аманат етер асыл мұрамыз болып табылады.
Қазақстанды ортақ Отанымыз деп білетін әрбір азаматтың ел дамуына, оның өркендеуіне қосар өзіндік үлесі бар. Қай салада еңбек етсек те, мемлекетіміздің дамуына адал қызмет ету, заңды құрметтеу, ұлттық құндылықтарды сақтау және қоғамдық келісімді нығайту – баршамызға ортақ перзенттік міндет. Өйткені елдің болашағы тек тарихи жетістіктермен емес, бүгінгі ұрпақтың жауапкершілігімен, отансүйгіштігімен, бірлігімен және жасампаз еңбегімен қалыптасады.
Шымкент қаласының Әзербайжан этномәдени бірлестігі үшін де Қазақстандағы бейбітшілік пен келісімді сақтау, этносаралық татулықты нығайту және ұрпақтар сабақтастығын жалғастыру – басты маңызды бағыттардың бірі. Шымкенттегі әзербайжан халқының өкілдері еліміздің қоғамдық, мәдени, білім беру және әлеуметтік өміріне белсенді араласып, Қазақстанның өркендеуіне өз үлестерін тұрақты түрде қосып келеді. Біз мұны ортақ Отанымызға деген шексіз құрмет пен жауапкершіліктің көрінісі деп білеміз.
Қазақстанның әрбір жетістігі мен жеңісі – барша азаматтың ортақ еңбегінің жемісі. Елде бірлік бар жерде береке орнайды, ынтымақ бар жерде өркендеу болады. Сондықтан Республика күні бізге өткен тарихымызды бағалап қана қоймай, болашақ алдындағы жауапкершілігімізді терең сезінуге зор мүмкіндік береді.
Осы айтулы мерекеде барша қазақстандықтарға зор денсаулық, отбасыларына амандық, еңбектеріне табыс тілеймін! Елімізде әрдайым бейбітшілік пен тұрақтылық салтанат құрып, халқымыздың бірлігі бекем, тәуелсіздігіміз тұғырлы болсын. Қазақстанымыздың абыройы асқақтап, келешегі кемел, болашағы жарқын болғай!
Республика күні құтты болсын! Еліміз аман, жұртымыз тыныш болсын!
Ибрагимов Натиг Надир оглы,
«Шымкент қаласының Әзербайжан этномәдени бірлестігі» қоғамдық бірлестігінің төрағасы
