Шымкент университетінде жастардың қатысуымен этносаралық келісім, медиация, бірлік пен татулық құндылықтарын насихаттауға бағытталған кездесу өтті.
Іс-шараға Шымкент қаласы Дін істері басқармасының «Дін мәселелерін зерттеу орталығы» КММ бөлім басшысы Рауан Қыпшақбаев, «Қоғамдық келісім» КММ жанындағы Медиация кеңесінің төрағасы Дана Кенжеқұлова және Жастар ресурстық орталығының аутрич және NEET жастармен жұмыс бөлімінің маманы Нұржақсын Қармантай қатысты.
Кездесу барысында жастарға этносаралық татулықты сақтау, қоғамдағы өзара сыйластықты нығайту, түрлі көзқарастар арасындағы түсіністікті қалыптастыру және даулы мәселелерді бейбіт жолмен шешудегі медиацияның рөлі туралы түсіндірілді. Сонымен қатар жастардың қоғамдық өмірге белсенді араласуы, жауапкершілігі мен азаматтық ұстанымын қалыптастыру мәселелеріне назар аударылды.
«Қоғамдағы бірлік пен татулық әр адамның өзінен басталады. Кез келген келіспеушілікті ашуға бой алдырмай, өзара түсіністік пен сабыр арқылы шешуге ұмтылу қажет. Медиация – адамдарды ортақ мәмілеге келтіріп, өзара сенімді нығайтатын тиімді құрал. Сондықтан жастардың бойында келісім мәдениетін қалыптастырудың маңызы зор», – деді Медиация кеңесінің төрағасы Дана Ақәділқызы.
Кездесу соңында қатысушылар жастарды қоғамдық келісімді сақтауға, этносаралық татулықты нығайтуға және ортақ құндылықтар төңірегінде топтасуға үндеді.
Жиын барысында медиацияның күнделікті өмірдегі маңызына ерекше назар аударылды. Бұл тәсіл адамдар арасындағы келіспеушіліктерді өзара диалог арқылы реттеуге, тараптардың пікірін тыңдауға және екі жаққа да қолайлы шешім табуға мүмкіндік береді. Мұндай мәдениетті қалыптастыру отбасында, оқу орнында және қоғамдық ортада туындайтын мәселелердің ушығуына жол бермеуге ықпал етеді.
Мамандар жастардың бойында жанжалдарды бейбіт жолмен шешу, өз пікірін мәдениетті түрде жеткізу және өзгенің көзқарасын құрметтеу дағдыларын дамытудың маңызын атап өтті. Әсіресе әлеуметтік ортада әртүрлі пікірлердің болуы заңды құбылыс екенін түсініп, келіспеушіліктерді өзара құрмет негізінде талқылай білу қажет. Бұл – саналы азаматтық ұстанымның маңызды белгілерінің бірі.
Сонымен қатар этносаралық келісімді нығайтуда мәдени әралуандықты құрметтеу, өзге этностардың тілі мен дәстүріне түсіністікпен қарау және ортақ қоғамдық құндылықтарды сақтау маңызды екені айтылды. Қоғамдағы тұрақтылық пен бейбітшілікті сақтау әрбір азаматтың жауапкершілігіне байланысты.
Осындай ақпараттық-түсіндіру кездесулері жастардың қоғамдық келісім, медиация және азаматтық жауапкершілік туралы түсінігін кеңейтуге бағытталған. Жас ұрпақтың бойында өзара сыйластық пен келісім мәдениетін қалыптастыру – бірлігі бекем, татулығы жарасқан қоғамның негізі.
