Қазақстан Республикасының ұлттық саясатының негізгі өзегі – елдегі барлық этнос өкілдерінің тілін, мәдениетін, салт-дәстүрі мен әдет-ғұрпын сақтауға, дамытуға және өзара құрмет көрсетуге негізделген. Бейбітшілік пен келісімді қастерлейтін мемлекетімізде қоғамдық тұрақтылықты нығайту бағытындағы ауқымды жұмыстар жүйелі түрде жүзеге асырылып келеді. Осы орайда Шымкент қалалық Достық үйінде ұйғыр этносының бай тілі, мәдениеті мен салт-дәстүрлерін дәріптеуге арналған тағылымды мерекелік іс-шара өтті.
Шараға Шымкент қаласы ішкі саясат және жастар істері жөніндегі басқармасына қарасты «Қоғамдық келісім» КММ басшысы Заңғар Үсіпахметов, қаладағы этномәдени бірлестіктердің төрағалары мен өкілдері, белсенді жастар және қала тұрғындары қатысты. Мерекелік жиын барысында ұйғыр халқының ұлттық мәдениеті, қолөнері мен бай өнері кеңінен таныстырылып, жүректерге жылу сыйлаған әсем әндер шырқалды. Ерекше атмосфераға құрылған бұл шараға әртүрлі этнос өкілдерінің шығармашылық ұжымдары және Алматы қаласынан арнайы келген қонақтар қатысып, өз өнерлерін ортаға салды.
Жиын барысында сөз алған Заңғар Үсіпахметов еліміздегі әрбір этностың тілін, мәдениеті мен салт-дәстүрін қастерлеп, сақтаудың мемлекеттік саясат үшін маңызы зор екенін атап өтті. Оның айтуынша, Шымкент шаһарында әр этнос өкілі өз ана тілі мен мәдениетін еркін дәріптеп қана қоймай, қоғамдағы өзара сыйластық пен түсіністікті одан әрі нығайтуға лайықты үлес қосып келеді. Мұндай іс-шаралардың тәрбиелік мәні зор, өйткені олар өскелең ұрпақтың бойында отансүйгіштік, әділдік және жауапкершілік сезімдерін қалыптастырады.
Мерекелік бағдарлама барысында ұлттық өнердің сан алуан бағыттары көрсетіліп, ұйғыр халқының рухани құндылықтары көпшілікке тағы бір мәрте паш етілді. Әсіресе, жастардың бұл шараға белсенді түрде атсалысуы ұлттық дәстүрлер мен ата-баба мұрасын кейінгі буынға адал жеткізудің жарқын көрінісі болды. Рухани сабақтастық пен ұрпақтар арасындағы байланысты арттыру – қоғамдық тұрақтылықтың кепілі.
Ұлттық мәдениетті сақтау мен дамыту әрқашан ана тіліне, ата-баба дәстүріне, бай өнерге және тарихи-рухани мұраға деген терең құрметтен басталады. Осы бағытта қаладағы этномәдени бірлестіктердің атқарып жатқан жұмыстары өте ауқымды. Олар жастардың бос уақытын тиімді ұйымдастырып қана қоймай, оларды этносаралық татулық рухында тәрбиелеуге, ортақ отанға деген патриоттық сезімін оятуға айрықша үлес қосып келеді.
Қалалық Достық үйі әр жылдары әртүрлі этномәдени бірлестіктерді бір шаңырақ астына топтастырып, халықтар арасындағы достық, бірлік пен өзара түсіністікті тас түйін етіп байлайтын маңызды диалог алаңына айналды. Мұндай мазмұнды шаралар жас буынға мәдени әралуандылықты құрметтеуді үйретіп, қоғамдық келісімді нығайтуға және елдегі тұрақтылықты бағалауға зор ықпал етеді.
