«Сайрам» медициналық колледжінде студенттердің мемлекеттік тілге деген құрметін арттыру, қазақ тілінің қоғамдағы біріктіруші рөлін кеңінен насихаттау және этносаралық татулық пен қоғамдық келісім құндылықтарын дәріптеу мақсатында «Қазақ тілі – Ұлы даланың ұлтаралық тілі» тақырыбында кездесу өтті.
Кездесудің негізгі мақсаты – жастар арасында мемлекеттік тілдің мәртебесін түсіндірумен қатар, тіл арқылы қоғам мүшелерінің өзара түсіністігі мен құрметін нығайту. Студенттерге қазақ тілінің еліміздегі түрлі этнос өкілдерін ортақ мақсат пен құндылықтар төңірегінде топтастыратын маңызды құрал екені айтылды.
Кездесуге Шымкент қаласы Дін істері басқармасы «Дін мәселелерін зерттеу орталығы» КММ-нің теолог маманы Әбдіманап Нұрхан, «Қоғамдық келісім» КММ жанындағы Медиация кеңесінің мүшесі, кәсіби медиатор Шамирзаев Аббас, сондай-ақ Жастар ресурстық орталығының Аутрич және NEET жастармен жұмыс бөлімінің маманы Құрманғазы Лаура қатысты.
Мамандар өз сөздерінде жастардың қоғамдық ортадағы белсенділігі мен жауапкершілігінің маңызына тоқталды. Әсіресе түрлі көзқарастағы адамдармен мәдениетті қарым-қатынас орнату, пікірді құрметпен жеткізу және кез келген мәселені бейбіт жолмен шешудің маңыздылығы атап өтілді.
Іс-шара барысында мемлекеттік тілдің қоғамдық өмірдегі маңызы, қазақ тілінің әртүрлі этнос өкілдерін біріктіретін ортақ құндылық ретіндегі орны туралы сөз қозғалды. Сонымен қатар жастардың құқықтық және діни сауаттылығын арттыру, қоғамдағы өзара сыйластық пен түсіністікті қалыптастыру, даулы жағдайлардың алдын алу мәселелері талқыланды.
Қатысушылар тіл үйренудің тек білім алу үдерісі емес, елдің мәдениеті мен тарихын танудың да бір жолы екенін атап өтті. Мемлекеттік тілді меңгеру жастардың қоғамдық ортаға еркін араласуына, түрлі әлеуметтік топтармен байланыс орнатуына және азаматтық жауапкершілігін арттыруына мүмкіндік береді.
«Қазақ тілі – тек қарым-қатынас құралы ғана емес, қоғамдағы өзара түсіністік пен бірлікті нығайтатын маңызды құндылық. Мемлекеттік тілді құрметтеу – елдің ортақ мәдени кеңістігіне құрметпен қараудың көрінісі. Жастардың тілге деген қызығушылығы мен жауапкершілігін арттыру арқылы қоғамдық келісімнің берік негізін қалыптастыра аламыз», – деді кәсіби медиатор Аббас Ахмадшаевич.
Кездесу барысында студенттер өзара сыйластық, толеранттылық және қоғамдық келісімнің жастар өміріндегі маңызы жөнінде пайдалы мағлұмат алды. Ашық пікір алмасу форматында өткен шара қатысушылардың өз ойын еркін жеткізіп, мамандарға көкейдегі сауалдарын қоюына мүмкіндік берді.
Кездесу соңында студенттер өздерін қызықтырған сұрақтарын қойып, мамандармен пікір алмасты.
