«Авимед» көпсалалы колледжі студенттері арасында құқықтық сауаттылықты арттыру, әлеуметтік қауіптердің алдын алу және патриотизмді дамыту, бірлік пен ынтымақ құндылықтарын дәріптеу мақсатында ақпараттық-түсіндіру жұмыстары жүргізілді.
Студенттермен өткен кездесуге қалалық ішкі саясат басқармасы «Қоғамдық келісім» мекемесінің қызметкері Н.Абдукаримов, «Жастар ресурстық орталығының» маманы Н.Қармантай және қалалық дін істері басқармасы «Дін мәселелерін зерттеу орталығы» мекемесінің теологы Н.Аманкелді қатысып, күн тәртібіндегі мәселелер бойынша сөз сөйлеп, жастармен пікір алмасты.
Жастарға әлеуметтік желілерде сақ болуға, ұлтараздық пен діни алауыздыққа жол бермеуге, татулық пен бірлікті сақтауға, жалған ақпараттарға сенбеуге, Отан алдындағы әскери борышты өтеу, құқық бұзушылықтың алдын алу мен кереғар діни ағымдардан сақтану жайы ұғындырылды.
Кездесу барысында жастардың қоғамдағы орны мен азаматтық жауапкершілігіне де ерекше назар аударылды. Қазіргі таңда ақпараттық технологиялардың қарқынды дамуына байланысты жастардың әлеуметтік желілердегі ақпаратты дұрыс қабылдап, оның шынайылығын саралай білуі маңызды. Күмәнді ақпараттарды таратпау, арандатушылық сипаттағы жарияланымдарға ермеу және кез келген мәліметке сын тұрғысынан қарау – ақпараттық қауіпсіздікті қамтамасыз етудің маңызды шарттарының бірі.
Сонымен бірге студенттерге қоғамдық келісім мен тұрақтылықтың ел дамуы үшін маңызы түсіндірілді. Қазақстанның басты құндылықтарының бірі – түрлі этнос пен мәдениет өкілдерінің бейбіт қатар өмір сүруі, өзара құрмет пен түсіністіктің қалыптасуы. Бірлік пен ынтымақты сақтау әр азаматтың ортақ жауапкершілігі екені айтылды. Жастардың бойында достықты, толеранттылықты, өзге адамның пікірі мен мәдениетіне құрметпен қарауды қалыптастыру – қоғамның болашағы үшін маңызды.
Патриоттық тәрбие мәселесі де кездесудің негізгі бағыттарының бірі болды. Отанға деген сүйіспеншілік туған жерді құрметтеуден, елдің заңдарын сақтаудан, қоғамға пайдалы болуға ұмтылудан және өз міндетін жауапкершілікпен атқарудан басталатыны түсіндірілді. Әскери борышты өтеу – азаматтық парыздың бірі екені айтылып, ел қауіпсіздігі мен мемлекеттің тұрақтылығын қамтамасыз етудегі әр азаматтың жауапкершілігі атап өтілді.
Дін саласына қатысты мәселелер бойынша теолог маман жастарға діни сауаттылықтың маңызын түсіндіріп, күмәнді діни ақпараттар мен кереғар ағымдардың ықпалына түспеудің жолдары туралы кеңестер берді. Жастарға дін мәселесінде тек сенімді әрі ресми ақпарат көздеріне жүгіну қажеттігі ескертілді. Зайырлы мемлекет қағидаттарын құрметтеу, діни сенім бостандығы мен қоғамдық тұрақтылықты сақтау арасындағы өзара байланысты түсіну қажеттігі айтылды.
Мұндай ақпараттық-түсіндіру кездесулері жастардың құқықтық және діни сауаттылығын арттырып қана қоймай, олардың қоғамдық белсенділігін күшейтуге мүмкіндік береді. Жастардың бойында әділдік, сенім, жауаптылық, өзара құрмет және ынтымақ секілді құндылықтардың қалыптасуы – берік әрі тұрақты қоғам құрудың маңызды негізі. Осы бағыттағы жұмыстар алдағы уақытта да жүйелі түрде жалғасып, жастарды ел болашағына жауапкершілікпен қарауға, бейбітшілік пен қоғамдық келісімді сақтауға бағыттай бермек.
