Алматыда Қытай мен Орталық Азия кәсіпкерлері арасындағы іскерлік байланысты нығайтуға бағытталған ауқымды халықаралық форум-көрме өтіп жатыр. 20–22 тамыз аралығында ұйымдастырылған шараға Қытайдың Цзянсу және өзге де өңірлерінен 300-ден астам өндіруші компания, инвесторлар, сатып алушылар мен бизнес өкілдері қатысуда.
Оқи отырыңыз...
Халықаралық алаңға Қазақстанмен қатар Қырғызстан, Өзбекстан және Орталық Азияның өзге де елдерінен кәсіпкерлер жиналды. Бұл өз кезегінде көрменің тек тауар таныстыратын алаң емес, жаңа іскерлік байланыстар мен инвестициялық жобаларды қалыптастыратын өңірлік маңызы бар платформаға айналғанын көрсетеді.
Іс-шараға Түркістан облысы кәсіпкерлер палатасының директоры Асылан Ибадуллаев қатысып, қытайлық компаниялар мен мемлекеттік құрылымдардың өкілдерімен кездесулер өткізуде. Келіссөздер барысында өңір кәсіпкерлерінің халықаралық нарыққа шығуы, инвестиция тарту, өндірістік кооперация орнату және бірлескен жобаларды жүзеге асыру мүмкіндіктері талқылануда.
Қытайлық тарап үшін Орталық Азия нарығының әлеуеті жоғары. Көрме аясында қытайлық компаниялар өңірден ауыл шаруашылығы өнімдері мен азық-түлік, шикізат, минералдық ресурстар, тоқыма және экспорттық әлеуеті бар басқа да тауарларды жеткізушілерді іздеуде. Сонымен бірге Қазақстанда өндірісті жергіліктендіру, дистрибуция, технологиялық және инвестициялық әріптестік мәселелеріне де басымдық берілуде.
Бұл бағыт Түркістан облысының кәсіпкерлері үшін де жаңа мүмкіндіктерге жол ашады. Өңірдің аграрлық, өндірістік және кәсіпкерлік әлеуетін халықаралық серіктестерге таныстырып, нақты бизнес-контактілер орнату арқылы жаңа нарықтарға шығуға мүмкіндік бар.
Түркістан облысы кәсіпкерлер палатасы өңір бизнесінің сыртқы нарықтарға шығуына, жаңа серіктестер табуына және инвестициялық жобаларды ілгерілетуге бағытталған жұмысты жалғастыруда. Алматыдағы форум-көрме осы жұмыстардың нақты нәтижеге бағытталған маңызды алаңдарының бірі болып отыр.
