Шымкент қаласы ішкі саясат басқармасы «Қоғамдық келісім» мекемесі жанындағы ақпараттық-түсіндіру тобының мүшелері Қаратау ауданы Сайрам тұрғын алабында кездесу өткізді.
Қоғамдық келісім мен жалпыұлттық бірлікті нығайту бағытында атқарылған жұмыстар мен алдағы межелі міндеттер айтылған жиында Ақсақалдар кеңесі төрағасының орынбасары Б.Жалмұрзаев, Қаратау ауданы әкімі аппаратының бас маманы Б.Әділханов, «Дін мәселелерін зерттеу орталығы» мекемесінің теолог маманы Н.Әбдіманап, Сайрам тұрғын алабы биінің орынбасары Б.Шерметов, жергілікті учаскелік полиция қызметкері Ш.Хасанов, Қаратау аудандық өзбек этномәдени бірлестігі төрағасының орынбасары Д.Ярметова, Қаратау ауданы ардагерлер ұйымы төрағасының орынбасары Б.Исмаилова сынды азаматтар мен белсенділер сөз сөйлеп, өз ойларын жеткізді.
Кездесуде этносаралық татулықты бекемдеу, тұрғындардың құқықтық мәдениетін көтеру жайы айрықша айтылып, мәдени әралуандық пен этносаралық келісімді нығайту жайы баяндалды.
Жиын соңында топ мүшелері қатысушылар тарапынан қойылған сауалдарға жауап беріп, жас буынның тәрбиесіне назар аудару, құқықтық мәдениеттi арттыру, азаматтар арасындағы өзара түсіністікті бекемдеу туралы пікір алмасты.
Кездесу барысында қоғамдық тұрақтылық пен бейбітшілікті сақтау әрбір азаматтың ортақ жауапкершілігі екені атап өтілді. Әртүрлі этнос өкілдерінің бір шаңырақ астында өзара сыйластық пен түсіністік жағдайында өмір сүруі – елдегі тұрақтылықтың маңызды негіздерінің бірі екені айтылды. Осы ретте қоғамдық келісімді сақтау тек мемлекеттік органдардың ғана емес, қоғамның барлық мүшелерінің бірлескен іс-қимылын қажет ететіні сөз болды.
Ақпараттық-түсіндіру тобының мүшелері тұрғындарға ел аумағында қалыптасқан татулық пен тұрақтылықтың құндылығы жөнінде түсіндірме жұмыстарын жүргізді. Сонымен қатар түрлі мәдениеттер мен салт-дәстүрлерге құрметпен қарау, өзара пікір алмасу мәдениетін қалыптастыру және қоғамдық мәселелерді бейбіт жолмен шешудің маңыздылығына тоқталды. Қоғамдағы кез келген мәселені ушықтырмай, заң аясында және өзара түсіністік негізінде шешу қажеттігі түсіндірілді.
Жиында жастар тәрбиесі де басты назардағы мәселелердің бірі болды. Жас ұрпақтың бойына отансүйгіштік, үлкенге құрмет, кішіге ізет, жауапкершілік пен толеранттылық құндылықтарын сіңірудің маңызы айтылды. Әсіресе әлеуметтік желілердегі ақпаратқа сын көзбен қарап, арандатушылық сипаттағы, жалған немесе қоғамдағы алауыздықты күшейтетін мәліметтерге ермеу қажеттігі жөнінде түсіндіру жұмыстарының маңыздылығы атап өтілді.
Қатысушылар тарапынан да бірқатар ұсыныс-пікірлер айтылып, тұрғындармен осындай кездесулерді тұрақты түрде өткізу қажеттігі ортаға салынды. Өйткені ашық диалог орнату, халықтың көкейіндегі мәселелерді тыңдау және тиісті түсіндіру жұмыстарын жүргізу қоғамдық сенімді арттыруға ықпал етеді.
Жалпы, мұндай кездесулер тұрғындардың құқықтық сауаттылығын арттырып қана қоймай, түрлі этнос өкілдері арасында өзара құрмет пен ынтымақтастықты нығайтуға мүмкіндік береді. Этносаралық келісім – ел бірлігінің берік негізі. Сондықтан татулықты сақтау, қоғамдық тұрақтылықты нығайту және бейбіт өмірдің қадірін білу – барша азаматқа ортақ міндет.
