«10 тамыз – Абай күні» мерекесі қарсаңында Шымкент қаласындағы Шымсити паркінде «Адамзаттың перзенті – Ұлы Абай» атты ауқымды концерттік кеш ұйымдастырылды. Ерекше рухани сипатқа ие бұл шара қала тұрғындары мен қонақтарының басын қосып, ұлы ақынның бай мұрасын дәріптеуге арналды. Шымкент қаласының өнер ұжымдары мен танымал орындаушылары жұртшылыққа ұлттық өнердің озық үлгілерін ұсынып, хакімнің халық сүйіп тыңдайтын музыкалық туындыларын шырқады.
Іс-шараның басты мақсаты – қазақтың ұлы ақыны, ойшылы әрі ағартушысы Абай Құнанбайұлының шығармашылығын өскелең ұрпақ арасында кеңінен насихаттау, көркем әдебиетті, терең мағыналы поэзияны сүйетін қала тұрғындарының рухани танымын арттыру. Сонымен қатар, ұлттық театр және музыка өнерінің құндылықтарын көрсете отырып, қоғамдағы бірлік пен тұрақтылықты, әділдік пен ынтымақты, сенім мен жауаптылықты насихаттайтын рухани-патриоттық тәрбие жұмыстарын күшейту көзделді.
Кеш барысында қазақтың классикалық өнері мен ұлы ақынның шығармашылығы үйлесім тапқан сан алуан нөмірлер орындалды. Атап айтқанда, Шымкент қалалық Ж.Шанин атындағы қазақ драма театрының әртістері «Абай ауылы» атты мазмұнды прологты сахналап, көрермендерге ерекше әсер сыйлады. Сондай-ақ «Шымкент концерт» концерттік ұйымы және Шымкент қалалық опера және балет театрының талантты әншілерінің орындауында Л.Хамиди мен А.Жұбановтың «Абай» операсынан «Тойбастар» шырқалды. Хор әртістерінің орындауындағы «Қарлығаш» әні мен Абайдың халық жүрегінен орын алған «Айттым сәлем Қаламқас», «Желсіз түнде жарық ай», «Көзімнің қарасы» сынды мәңгілік туындылары кештің көрігін қыздырды.
Концертке жиылған қала тұрғындары мен қонақтары хакімнің даналыққа толы қара сөздері мен жүрекжарды поэзиясынан рухани қуат алып, керемет көңіл күйге бөленді. Мұндай шаралар азаматтардың бойында Отанға деген сүйіспеншілікті арттырып, ұлттық сананы жаңғыртуға өлшеусіз үлес қосады.
Абай мұрасы – халықтың сарқылмас өшпес қазынасы. Шаһарда ұлы ақынның мұрасын дәріптеуге бағытталған осындай іс-шаралар алдағы уақытта да өз жалғасын тауып, жастардың патриоттық сезімін оятуға, қоғамдағы рухани келісім мен тұрақтылықты нығайтуға негіз бола бермек.
Абайдың өсиеттері мен рухани мұрасы бүгінгі тәуелсіз Қазақстанның даму жолында, әсіресе өскелең ұрпақты отансүйгіштікке, адалдыққа және парасаттылыққа тәрбиелеуде баға жетпес құрал болып табылады. Қала көлемінде ұйымдастырылатын осындай мәдени-танымдық шаралар жұртшылықты топтастырып қана қоймай, қоғамдағы бірлік пен тұрақтылықты, өзара түсіністік пен ынтымақты нығайтуға айтарлықтай үлес қосады. Шымкент қаласы әкімдігінің қолдауымен өтетін бұл бағыттағы жұмыстар алдағы уақытта да өз жалғасын тауып, жас буынның санасына ұлттық құндылықтарды сіңіруге бағытталған ауқымды жобалармен толыға бермек.
