Түркістан облысының кәсіпкерлер палатасында өңір кәсіпкерлері мен инвесторларының қатысуымен «Қаржылық шешімдер және бизнеске арналған жаңа мүмкіндіктер» тақырыбында бизнес-кездесу ұйымдастырылды.
Іс-шараға өңір кәсіпкерлері, «ЦентрКредит» банкінің және «ҚазСтандарт» республикалық мемлекеттік кәсіпорнының өкілдері қатысты. Кездесудің негізгі мақсаты – бизнес өкілдерін заманауи қаржыландыру тетіктерімен, инвестициялық жобаларды іске асыруға арналған құралдармен, мемлекеттік қолдау бағдарламаларымен және қауіпсіз банктік қызметтермен таныстыру.
Жиын барысында «ЦентрКредит» банкінің мамандары лизингтік бағдарламалар, инвестициялық өнімдер, бизнесті сақтандыру, эскроу-шоттар, сондай-ақ сыртқы экономикалық қызметке арналған қаржылық шешімдер жөнінде кеңінен таныстырды. Сонымен қатар қатысушыларға кәсіпкерлікті дамытуға арналған банктік өнімдер, халықаралық есеп айырысу мүмкіндіктері мен бизнестегі қаржылық тәуекелдерді төмендетуге бағытталған заманауи құралдар туралы ақпарат берілді.
Өз кезегінде «ҚазСтандарт» РМК өкілдері отандық тауар өндірушілерді техникалық реттеу және стандарттау жүйесі арқылы қолдау тетіктеріне тоқталып, сапа талаптарына сәйкестікті қамтамасыз етудің маңызын түсіндірді.
Кездесуде мәмілелердің қауіпсіздігін қамтамасыз ететін эскроу-шоттың мүмкіндіктеріне ерекше назар аударылды. Мамандардың айтуынша, бұл жүйеде сатып алушының қаражаты келісімшарт талаптары толық орындалғанға дейін арнайы банктік шотта сақталады. Міндеттемелер орындалғаннан кейін ғана қаражат алушыға аударылады. Мұндай тәсіл есеп айырысудың ашықтығын қамтамасыз етіп, алаяқтық тәуекелдерін азайтуға және тараптардың құқықтары мен мүдделерін қорғауға мүмкіндік береді.
Палатаның Салалық даму және инвестициялық жобаларды сүйемелдеу бөлімінің басшысы Гүлназ Есетова мұндай кездесулердің кәсіпкерлер үшін практикалық маңызы жоғары екенін атап өтті.
«Қазіргі таңда бизнестің тұрақты дамуы қаржылық құралдарды тиімді пайдалана білумен тікелей байланысты. Осындай алаңдар кәсіпкерлерге жаңа мүмкіндіктерді танып-білуге, инвестициялық бастамаларды іске асыру жолдарын зерделеуге және мемлекеттік қолдау тетіктері туралы толыққанды мәлімет алуға мүмкіндік береді. Бұл жаңа жобалардың жүзеге асуына, іскерлік белсенділіктің артуына және өңірдің инвестициялық тартымдылығының күшеюіне оң ықпал етеді», – деді Гүлназ Есетова.
Кездесу соңында қатысушылар қаржыландыру тетіктері, инвестициялық жобаларды іске асыру, мемлекеттік қолдау шаралары және қауіпсіз есеп айырысу жүйелері бойынша өздерін қызықтырған сауалдарға жауап алып, сала мамандарымен пікір алмасты.
