Шымкент қаласында тұрғындардың діни сауаттылығын арттыру, жат діни ағымдардың алдын алу және азаматтарды кереғар діни идеологиялардың ықпалынан қорғау мақсатында ақпараттық-түсіндіру жұмыстары жүргізілді. Іс-шараны «Жастар ресурстық орталығы» КММ-сі мен Шымкент қаласы дін істері басқармасының «Дін мәселелерін зерттеу орталығы» КММ-нің мамандары бірлесе ұйымдастырды.
Ақпараттық-түсіндіру жұмыстары Нұр Сайрам базарында «Жат діни ағымдардан қорғану және алдын алу тәсілдері, сондай-ақ кереғар діни идеологиялардың ықпалынан сақтану» тақырыбында өткізілді. Кездесудің негізгі мақсаты – халыққа діни мәселелер бойынша дұрыс ақпарат беру, деструктивті діни идеологиялардың қауіптілігі жөнінде түсінік қалыптастыру және олардың алдын алу жолдарын түсіндіру.
Түсіндіру жұмыстары барысында базар келушілеріне жат діни ағымдардың қоғамға және жеке адамға тигізуі мүмкін кері әсері туралы жан-жақты мәлімет берілді. Мамандар азаматтарды діни мазмұндағы кез келген ақпаратқа сыни көзқараспен қарауға, күмәнді дереккөздерден тараған мәліметтерге бірден сенбеуге және діни мәселелер бойынша ақпаратты сенімді әрі ресми дереккөздерден алуға шақырды.
Сонымен қатар жат діни ағымдардың ықпалына түсу қаупін арттыратын факторлар мен алдын алу шараларына назар аударылды. Әсіресе интернет пен әлеуметтік желілерде таралатын түрлі діни материалдарға сақтықпен қараудың маңыздылығы айтылды. Мамандар белгісіз адамдардың ұсыныстарына ермеу, күмәнді діни топтардың кездесулеріне қатыспау және түсініксіз діни мәселелер туындаған жағдайда білікті мамандардан кеңес алу қажеттігін түсіндірді.
Кездесу барысында тұрғындарға діни сауаттылықтың адам мен қоғам қауіпсіздігін қамтамасыз етудегі маңызы да түсіндірілді. Дін саласындағы негізгі ұғымдарды дұрыс түсіну және сенімді ақпарат көздерін ажырата білу азаматтардың түрлі теріс идеологиялық ықпалдарға қарсы тұру қабілетін арттыратыны атап өтілді.
Ақпараттық-түсіндіру жұмыстары барысында базар келушілеріне арнайы ақпараттық жадынамалар мен түсіндірме парақшалары таратылды. Материалдарда жат діни ағымдардың қауіптілігі, олардың негізгі белгілері, күмәнді ақпаратты ажырату және деструктивті идеологиялардың алдын алу жолдары жөнінде қажетті мәліметтер қамтылды.
Мамандар тұрғындардың сұрақтарына жауап беріп, дін саласына қатысты жеке мәселелер бойынша түсініктемелер берді. Кездесу ашық форматта өтіп, азаматтар өздерін қызықтырған тақырыптар бойынша пікір алмасуға мүмкіндік алды.
Алдын алу бағытындағы мұндай жұмыстардың маңызы – халықтың діни сауаттылығын жүйелі түрде арттырумен қатар, қоғамдағы тұрақтылық пен өзара түсіністікті нығайту. Әсіресе жастар арасында ақпараттық қауіпсіздік пен сыни ойлау дағдыларын қалыптастыру жат діни идеологиялардың таралуына тосқауыл қоюдың маңызды тетігі болып табылады.
Іс-шара қорытындысында тұрғындарға діни ақпаратты таңдауда мұқият болу, заң талаптарын сақтау, күмәнді діни насихаттан аулақ болу және кез келген мәселе бойынша білікті мамандардың көмегіне жүгіну ұсынылды. Ақпараттық-түсіндіру және алдын алу жұмыстары алдағы уақытта да жалғасын табады.
