Шымкент қаласындағы Абай саябағында тұрғындардың діни сауаттылығын арттыру, деструктивті діни идеологиялардың алдын алу және азаматтарға діни мәселелер бойынша дұрыс ақпарат жеткізу мақсатында ақпараттық-түсіндіру жұмыстары жүргізілді. Іс-шараға «Дін мәселелерін зерттеу орталығы» КММ-нің теолог маманы Сымбат Сейітхан қатысып, қала тұрғындарымен тікелей кездесу өткізді.
Түсіндіру жұмыстары «Жат діни ағымдардан қорғану және алдын алу тәсілдері және кереғар діни идеологиялардың ықпалынан сақтау» тақырыбына арналды. Кездесу барысында діни сауаттылықты арттырудың маңызы, күмәнді діни ақпараттың адам санасына әсері және теріс идеологиялық ықпалдың алдын алу жолдары жөнінде кеңінен түсініктеме берілді.
Теолог маман қазіргі ақпараттық кеңістікте діни мазмұндағы түрлі материалдардың көптеп таралатынына назар аударып, тұрғындарды кез келген ақпаратқа сын көзбен қарауға шақырды. Әсіресе әлеуметтік желілер мен интернет ресурстарында таралатын діни уағыздар мен жазбалардың мазмұнына сақтықпен қарау, белгісіз ақпарат көздеріне сенбеу және діни мәселелер бойынша ақпаратты сенімді дереккөздерден алу қажеттігі айтылды.
Кездесу барысында теріс діни ағымдардың қоғамға және жеке тұлғаға тигізуі мүмкін кері әсері түсіндірілді. Деструктивті идеологияның ықпалы адамның қалыпты әлеуметтік байланыстарына, отбасылық қарым-қатынасына және қоғамдық ортадағы көзқарасына әсер етуі мүмкін екені атап өтілді. Осыған байланысты азаматтардың ақпараттық және діни сауаттылығын арттырудың алдын алу жұмыстарындағы орны ерекше екені айтылды.
Тұрғындарға діни ақпараттық парақшалар таратылып, онда теріс діни ағымдардың қауіптілігі, олардың негізгі белгілері және мұндай идеологиялық ықпалдан сақтану жолдары туралы қажетті мәліметтер ұсынылды. Сонымен қатар жадынамалық материалдар тарқатылып, азаматтарға күнделікті өмірде діни ақпаратпен жұмыс істеу кезінде ескеретін маңызды мәселелер түсіндірілді.
Ақпараттық-түсіндіру жұмыстары ашық форматта жүргізіліп, саябаққа келген тұрғындар өздерін қызықтырған сұрақтарын теолог маманға қойып, нақты жауаптар алды. Қатысушылар дін саласына қатысты көкейде жүрген мәселелер бойынша пікір алмасып, қажетті кеңестерге ие болды.
Мамандардың айтуынша, деструктивті діни ағымдардың алдын алуда жүйелі ақпараттық-түсіндіру жұмыстарының маңызы зор. Тұрғындардың діни сауаттылығын арттыру, жастардың сыни ойлау қабілетін қалыптастыру және күмәнді ақпараттың ықпалына түспеуге үйрету – қоғамдағы тұрақтылықты сақтаудың маңызды бағыттарының бірі.
Осындай кездесулер азаматтарға діни мәселелер бойынша дұрыс бағдар беріп қана қоймай, қоғамдық қауіпсіздік пен өзара түсіністікті нығайтуға ықпал етеді. Ақпараттық-түсіндіру жұмыстары алдағы уақытта да жалғасын табады.
