Шымкент қаласының А.С. Пушкин атындағы әмбебап ғылыми кітапханасында «Конституция – қоғам мен мемлекет арасындағы сенімнің негізі» тақырыбында кәсіби медиаторлардың қатысуымен дөңгелек үстел мәжілісі өтті. Басқосуға кәсіби медиаторлармен қатар, ардагерлер, қоғамдық ұйымдардың төрағалары және қоғам белсенділері қатысты.
Кездесудің негізгі мақсаты – Конституцияның құқықтық мемлекет қалыптастырудағы рөлін түсіндіру, азаматтардың құқықтары мен бостандықтарын қорғаудың маңызын кеңінен насихаттау және қоғамдағы келісім мен тұрақтылықты нығайтуда медиация институтының мүмкіндіктерін талқылау болды.
Жиын барысында Конституцияның мемлекет пен қоғам арасындағы өзара жауапкершілік пен сенімді қалыптастырудағы орнына ерекше назар аударылды. Қатысушылар Ата Заңда бекітілген заң үстемдігі, азаматтардың теңдігі, құқықтары мен бостандықтарын қорғау қағидаттары қоғамның тұрақты дамуы үшін маңызды екенін атап өтті. Сонымен қатар даулы мәселелерді заң аясында шешудің және азаматтардың құқықтық сауаттылығын арттырудың қажеттілігі сөз болды.
Өз сөзінде Дана Кенжеқұлова Конституцияның мемлекет пен қоғам арасындағы өзара сенімнің берік іргетасы екенін атап өтті.
– Конституция – бұл заңдардың жиынтығы ғана емес, қоғамдағы тұрақтылықтың, әділеттіліктің және азаматтардың тең құқықтарының кепілі. Қоғамдағы кез келген дау мен келіспеушілікті заң аясында, өзара түсіністік пен келісім арқылы шешу – өркениетті қоғамның басты белгісі. Медиация институты осы құндылықтарды жүзеге асыруға қызмет етеді және қоғамдағы татулықты сақтаудың тиімді тетігі болып табылады, – деді Дана Ақәділқызы.
Дөңгелек үстел барысында медиацияның азаматтар арасындағы дауларды сотқа жеткізбей шешудегі мүмкіндіктері де талқыланды. Қатысушылардың пікірінше, тараптардың бір-бірін тыңдап, ортақ шешімге келуі қоғамдағы өзара құрмет пен сенімді нығайтады. Бұл ретте кәсіби медиаторлардың білімі мен тәжірибесі дауласушы тараптарға мәселені бейбіт жолмен реттеуге мүмкіндік береді.
Сондай-ақ құқықтық мәдениетті қалыптастыру, азаматтарға өз құқықтары мен міндеттерін түсіндіру және медиация институтын одан әрі дамыту бағытындағы ұсыныстар ортаға салынды. Қоғамдық ұйымдар мен азаматтық қоғам өкілдерінің бұл бағыттағы белсенділігі қоғамдық келісімді нығайтуға ықпал ететіні айтылды.
Жиын соңында қатысушылар Конституция қағидаттарын құрметтеу, заң үстемдігін сақтау және дауларды өзара түсіністік арқылы шешу мәдениетін қалыптастыру – тұрақты әрі әділетті қоғам құрудың маңызды шарттары екенін атап өтті.
