Түркістан облысы инвестициялық тартымдылығын тағы бір мәрте дәлелдеді. Бұл жолы Қытай Халық Республикасынан келген инвесторлар өңірде мақта шаруашылығын дамыту, егістік алқаптарын игеру және ауыл шаруашылығына қажетті тыңайтқыштар өндіретін зауыт салу мүмкіндіктерімен танысты.
Түркістан облысының Кәсіпкерлер палатасында өткен кездесуге «Silk Road Pastoral Agricultural Development Co., Ltd.» жауапкершілігі шектеулі серіктестігінің өкілдері Li Dou және компания басшысы Hu Qiujie қатысты. Кездесу барысында инвесторлар өңірдің табиғи-климаттық ерекшеліктері, ауыл шаруашылығы саласының әлеуеті, өндіріс орындарын орналастыру мүмкіндіктері және мемлекеттік қолдау тетіктері жөнінде жан-жақты ақпарат алды.
Облыстық кәсіпкерлер палатасы инвесторларды «Тұран» арнайы экономикалық аймағына бастап барып, өндірістік мақсатқа арналған бос жер телімдерін және инженерлік инфрақұрылыммен қамтамасыз етілген аумақтарды таныстырды. Сонымен қатар арнайы экономикалық аймақта жүзеге асырылатын жобаларға қарастырылған салықтық және кедендік жеңілдіктер, дайын инфрақұрылым мен қолайлы инвестициялық орта туралы кеңінен мәлімет берілді.
Түркістан облысы ауыл шаруашылығы өнімінің жалпы көлемі бойынша республикада бірінші орында тұр. Сонымен қатар еліміздегі мақта шаруашылығының негізгі орталығы ретінде Қазақстанда өндірілетін мақтаның басым бөлігі дәл осы өңірде өсіріледі. Сондықтан мақта өндірісін дамыту, оны терең өңдеу және агрохимия саласын өркендету өңір экономикасының стратегиялық бағыттарының бірі болып саналады. Бұл – инвесторлар үшін де зор мүмкіндік.
Түркістан облысы Кәсіпкерлер палатасының Салалық даму және инвестициялық жобаларды сүйемелдеу бөлімінің басшысы Гүлназ Есетова мұндай бастамалардың өңір экономикасы үшін маңызы зор екенін атап өтті.
«Түркістан облысы – инвестиция салуға қолайлы әрі аграрлық әлеуеті жоғары өңір. Бүгінде ауыл шаруашылығы саласы қарқынды дамып келеді. Мақта шаруашылығы мен оны терең өңдеуге бағытталған жобалар өңір экономикасының өсіміне тың серпін береді. Кәсіпкерлер палатасы инвесторларға жобаны жүзеге асырудың барлық кезеңінде қажетті қолдау көрсетіп, мемлекеттік органдармен өзара байланысты үйлестіруге әрдайым дайын. Біз үшін әрбір инвестициялық жоба – жаңа өндіріс, жаңа жұмыс орны және өңірдің экономикалық дамуына қосылған үлес», – деді Гүлназ Есетова.
Бүгінде Түркістан облысы агроөнеркәсіп кешенін жаңа деңгейге көтеруге бағытталған ірі инвестициялық жобаларды жүзеге асырып келеді. Шетелдік инвесторлардың қызығушылығы өңірдің халықаралық инвестициялық беделінің артып келе жатқанын көрсетеді. Ал мақта өсірумен қатар тыңайтқыш өндірісін жолға қоюға бағытталған жаңа бастама ауыл шаруашылығының өнімділігін арттырып қана қоймай, қосылған құны жоғары өндірістердің дамуына, жаңа жұмыс орындарының ашылуына және өңір экономикасының нығаюына жол ашады.
