Құрметті Сауран ауданының тұрғындары!
Мен қазіргі таңда қоғамдағы ең маңызды мәселелердің бірі – ұрпақ тәрбиесі деп ойлаймын. Себебі әрбір елдің болашағы тәрбиелі ұрпақпен өлшенеді. Бүгінгі бүлдіршін – ертең елдің азаматы, отбасының тірегі, қоғамның белсенді мүшесі. Сондықтан бала тәрбиесіне тек ата-ана ғана емес, бүкіл қоғам болып жауапкершілікпен қарауымыз қажет деп сенемін.
Қазақ халқы қашанда отбасы құндылығын жоғары қойған. «Отан – отбасынан басталады» деген сөздің астарында үлкен мән жатыр. Егер әр шаңырақта береке мен бірлік болса, ерлі-зайыптылар бір-біріне құрмет көрсетіп, балаларына мейірім мен ізгілік сыйласа, қоғамда да татулық пен тыныштық орнайды. Ал отбасыдағы сыйластық жоғалған жерде түсініспеушілік көбейіп, өкінішке қарай, зорлық-зомбылық сияқты келеңсіз жағдайлар орын алады.
Өкінішке қарай, соңғы уақытта қоғамда зорлық-зомбылыққа қатысты оқиғалар жиілеп бара жатқаны баршамызды алаңдатады. Мұндай жағдайлар ешбір отбасында болмауы керек. Зорлық ешқашан мәселенің шешімі болған емес және болмайды. Керісінше, ол адам тағдырына ауыр із қалдырып, балалардың психологиясына кері әсер етеді. Сондықтан мен зорлық-зомбылықтың кез келген түріне қарсымын және әрбір азаматты оған мүлде жол бермеуге шақырамын.
Біз балаларымызды мейірімділікке, сабырлылыққа, кешірімді болуға және адамды құрметтеуге үйретуіміз керек. Бала ата-анасының әрбір ісінен үлгі алады. Егер үйінде үлкенге құрмет көрсетіліп, кішіге қамқорлық жасалса, ол да сол тәрбиені бойына сіңіреді. Ал ұрыс-керіс пен дөрекілікті көріп өскен баланың санасына да сол әрекет қалыпты құбылыс болып көрінуі мүмкін. Сондықтан тәрбие ең алдымен өзіміздің іс-әрекетімізден басталуы тиіс.
Мен жастарымыздың білімді, еңбекқор, елін сүйетін, ұлттық құндылықтарды құрметтейтін азамат болып өскенін қолдаймын. Біз оларға тек жақсы сөз айтып қана қоймай, адал еңбекпен өмір сүрудің, үлкенді сыйлаудың, заңды құрметтеудің маңызын өзіміз үлгі болып көрсетуіміз қажет. Ұрпақ тәрбиесі – бір күндік жұмыс емес. Ол үздіксіз көңіл бөлуді, мейірімділікті және жауапкершілікті талап етеді.
Қазіргі таңда әлеуметтік желілердің ықпалы да өте жоғары. Балаларымыздың кіммен араласатынына, қандай ақпарат көріп жүргеніне бейжай қарауға болмайды. Уақытымыздың бір бөлігін балаларымызбен әңгімелесуге, олардың ойын тыңдауға, кітап оқуға, спортпен айналысуына және пайдалы істерге баулуға арнауымыз қажет. Сонда ғана олар жаман әдеттерден аулақ болып, дұрыс жолды таңдай алады.
Сонымен қатар, қоғамдық тәртіпті сақтау – әр азаматтың міндеті. Заңды құрметтеу, өзгенің құқығына қол сұқпау, қоғамдық орындарда мәдениетті болу – өркениетті қоғамның белгісі. Біз жастарға осыны түсіндіріп, заңға бағынатын, елдің тыныштығын ойлайтын азамат болып қалыптасуына ықпал етуіміз керек.
Мен аудан тұрғындарын бірлікке, татулыққа және өзара сыйластыққа шақырамын. Бір-бірімізге жанашыр болайық, қиындыққа тап болған адамға қолдау көрсетейік. Әр шаңырақта қуаныш пен береке, ата-ана мен бала арасында түсіністік болса, қоғамымыз да берік болады.
Мен қоғамда отбасы құндылықтарының нығаюын, зорлық-зомбылықтың азаюын, жастардың білімге, еңбекке және адалдыққа ұмтылуын қолдаймын. Мен еліміздің ертеңі тәрбиелі ұрпақтың қолында екеніне сенемін. Сондықтан әрқайсымыз өз отбасымыздан бастап мейірімділік пен адамгершілікті дәріптейік.
Тәрбиелі ұрпақ – тәуелсіз еліміздің ең үлкен байлығы. Ұлттың болашағы бүгінгі тәрбиеден басталады. Ендеше, ұрпағымызға дұрыс бағыт-бағдар беріп, татулықты ту етіп, зорлық-зомбылыққа жол бермейтін, заңды құрметтейтін, еңбекті қадірлейтін, елін сүйетін ұрпақ тәрбиелеуге бәріміз бірге атсалысайық.
БАЛТАБАЙ ЖАРЫЛҚАСЫНОВ ЕРМЕКБАЙҰЛЫ
Сауран ауданының ақсақалдар алқасынын төрағасы
