Түркістан облысында Қазақстан Республикасы Президентінің «Алтын сапа» сыйлығы мен «Қазақстанның үздік тауары» республикалық конкурс-көрмесіне арналған оқыту семинары ұйымдастырылды. Іс-шараның мақсаты – байқауға қатысушы кәсіпорындарға конкурс талаптарын түсіндіру, сапа менеджменті жүйесін жетілдіру және отандық өнімнің бәсекеге қабілеттілігін арттыруға қолдау көрсету.
Оқи отырыңыз...
Биыл аталған байқауларға Түркістан облысынан жалпы 24 кәсіпорын өтінім тапсырған. Оның ішінде «Алтын сапа» конкурсына 14 кәсіпорын қатысуға ниет білдірсе, «Қазақстанның үздік тауары» республикалық конкурс-көрмесіне 10 кәсіпорын өтінім берген.
Семинар барысында «Атамекен» ҚР ҰКП «Алтын Сапа» Президенттік сыйлығы мен «Қазақстанның үздік тауары» республикалық конкурстарын ұйымдастыру жөніндегі басқарушы директоры Мерей Исаева байқаулардың талаптары мен кезеңдері туралы кеңінен баяндады.
– «Бүгінде сапалы өнім шығару ғана жеткіліксіз. Кәсіпорындар өндірістегі тиімділік, басқару жүйесі, инновация мен әлеуметтік жауапкершілік бағыттарын қатар дамытуы қажет. “Алтын сапа” байқауы осы көрсеткіштердің барлығын кешенді бағалайтын маңызды жоба», – деді Мерей Исаева.
Сондай-ақ Түркістан облысы кәсіпкерлер палатасы директорының шағын кәсіпкерлікті дамыту жөніндегі орынбасары Ербол Әуелбеков қатысушыларға сәттілік тілеп, байқаулардың кәсіпкерлер үшін маңыздылығына тоқталды.
– «Президенттік “Алтын сапа” сыйлығы мен “Қазақстанның үздік тауары” байқауы – кәсіпорындардың сапаға деген жауапкершілігін арттыратын маңызды алаң. Бұл тек байқау ғана емес, отандық өнімнің беделін көтеріп, өңір кәсіпкерлерінің әлеуетін танытатын мүмкіндік. Түркістандық кәсіпорындардың жыл сайын белсенді қатысуы – бизнестің даму деңгейінің айқын көрсеткіші», – деді Ербол Әуелбеков.
Қатысушылар өңір экономикасының түрлі салаларын қамтиды. Атап айтқанда, азық-түлік өндірісі, жиһаз жасау, құрылыс материалдарын шығару, ауыл шаруашылығы өнімдерін өңдеу, қызмет көрсету және әлеуметтік кәсіпкерлік бағыттарында жұмыс істейтін кәсіпорындар бар. Бұл – Түркістан облысында өндірілетін өнім сапасының артып, жергілікті бизнестің бәсекеге қабілеттілігі күшейіп келе жатқанын көрсетеді.
Іс-шара барысында қатысушыларға конкурстық құжаттарды рәсімдеу тәртібі түсіндіріліп, менеджмент жүйесіндегі стандарттар мен сертификаттаудың рөлі талқыланды. Сонымен қатар кәсіпкерлер өздерін толғандырған сұрақтарына жауап алып, тәжірибе алмасты.
Айта кетейік, өңірлік кезең жеңімпаздары Түркістан облысының атынан республикалық кезеңге қатысу мүмкіндігіне ие болады. Аталған байқаулар отандық тауар өндірушілерді қолдауға, сапа мәдениетін дамытуға және Қазақстанда өндірілген өнімді кеңінен насихаттауға бағытталған.
