Түркістан облысы кәсіпкерле
р палатасында «Іскер аймақ» шағын бизнесті қолдаудың бірыңғай бағдарламасы аясында экономика салаларына рейтингтер беру әдістемесін түсіндіру және талқылауға арналған дөңгелек үстел отырысы өтті.
Жиында мемлекеттік органдар, қаржы институттары мен кәсіпкерлік саласының өкілдері бас қосып, Қазақстан Республикасы Үкіметінің 2025 жылғы 30 желтоқсандағы №1176 қаулысымен бекітілген рейтингтік әдістеменің өңір экономикасына ықпалы жан-жақты талқыланды.
Кездесу барысында Түркістан облысы кәсіпкерлер палатасы директорының орынбасары Ербол Ауелбеков жаңа әдістеменің кәсіпкерлікті дамытудағы маңызына тоқталып, рейтингтік бағалау жүйесі өңірдің экономикалық әлеуетін саралауға және басым бағыттарды айқындауға мүмкіндік беретінін атап өтті.
Ал, Палатаның Шағын кәсіпкерлікті дамыту бөлімінің сарапшысы Азат Тасполатов жаңа жүйенің кәсіпкерлер үшін тиімді тұстарына кеңінен тоқталды.
— Бұл рейтингтік әдістеме өңірлердің экономикалық белсенділігін нақты бағалауға мүмкіндік береді. Соның нәтижесінде мемлекеттік қолдау шаралары тиімді бағытталып, кәсіпкерлік саласының дамуына оң әсерін тигізеді. Ең бастысы, бизнес пен мемлекеттік органдар арасындағы өзара байланысты күшейтуге негіз қалыптасады, – деді Азат Тасполатов.
Сондай-ақ жиында Түркістан облысы кәсіпкерлік және сауда басқармасы тарапынан өңірдегі кәсіпкерлікті дамыту бағытындағы жұмыстар баяндалып, Ұлттық статистика бюросының Түркістан облысы бойынша департаменті рейтингтік бағалауда қолданылатын статистикалық мәліметтердің маңыздылығына тоқталды.
Өз кезегінде Түркістан облысы бойынша Мемлекеттік кірістер департаменті қажетті мәліметтердің қолда бар екенін, алайда ақпараттарды ұсыну Қазақстан Республикасы Қаржы министрлігі Мемлекеттік кірістер комитетінің тиісті тапсырмасы немесе ресми нұсқаулығы негізінде жүзеге асырылатынын жеткізді.
Бұдан бөлек, «Даму» кәсіпкерлікті дамыту қоры» Түркістан облысы бойынша аймақтық филиалы өңір кәсіпкерлерін қолдау бағытындағы бағдарламалар мен қаржылай қолдау құралдары жөнінде мәлімет берді.
Кездесу соңында қатысушылар өзара пікір алмасып, сұрақ-жауап алаңында рейтингтік жүйені жүзеге асыруға қатысты ұсыныстарын ортаға салды.
