Кентауда «AMANAT» партиясы Түркістан облыстық филиалы жанындағы «Әйелдер қанатының» «Шексіз мүмкіндік» жобасы аясында «Кәсіби бағдар беру – мамандық таңдаудағы тиімділік» тақырыбында мазмұнды дөңгелек үстел өтті. Жиынға мемлекеттік органдардың өкілдері, білім беру ұйымдары, кәсіпкерлер және әлеуметтік сала мамандары қатысып, өзара тәжірибе алмасып, нақты ұсыныстар ортаға салынды.
Іс-шараның басты мақсаты – ерекше білім беру қажеттілігі бар жастарға сапалы кәсіби бағдар беру, оларды колледждерге тарту және одан әрі тұрақты жұмысқа орналастыруды жетілдіру.
Жиынды «AMANAT» партиясы Түркістан облыстық филиалы төрағасының міндетін атқарушы, облыстық мәслихат депутаты, облыстық «Әйелдер қанатының» жетекшісі Қалыйма Жантөреева ашып, жобаның қоғам үшін айрықша маңызға ие екенін атап өтті. Ол жастардың дұрыс мамандық таңдауы – елдің тұрақты дамуының негізгі құралы екенін ерекше жеткізді.
Дөңгелек үстелде сөз алған Түркістан облысы кәсіпкерлер палатасының директоры Асылан Ибадуллаев жастарды еңбек нарығына бейімдеу бағытындағы нақты жұмыстарға тоқталды.
«Кәсіби бағдар беру – тек мамандық таңдаумен шектелмейді. Бұл – жастардың болашақ өмір жолын айқындайтын маңызды кезең. Біз жастарды кәсіпорындарға апарып, өндіріс орындарымен тікелей таныстырып келеміз. Ашық есік күндері мен бос жұмыс орындары жәрмеңкелері арқылы олардың саналы таңдау жасауына мүмкіндік жасап отырмыз. Алдағы уақытта да ерекше қажеттілігі бар жастарды жұмыспен қамтуға басымдық беріп, кәсіпкерлермен тығыз байланысты жалғастырамыз», – деді Асылан Сейілбекұлы.
Жиында сондай-ақ әлеуметтік кәсіпкерлікті дамыту мәселесі кеңінен талқыланды. Бүгінде өңірде 22 әлеуметтік кәсіпкер тіркелсе, олардың 12-сі мемлекеттік грантқа ие болған. Түркістан облысы кәсіпкерлер палатасының директоры бұл бағыттағы бастамаларды күшейтіп, әсіресе ерекше қажеттілігі бар азаматтарды жұмыспен қамтитын жобаларды көбейту қажеттігін атап өтті.
Сондай-ақ, Алматы қаласындағы табысты тәжірибелер де сөз болды. Атап айтқанда, ерекше қажеттілігі бар жандарды еңбекке тартып отырған кәсіпорындардың тиімді үлгілері қатысушылар тарапынан жоғары бағаланды.
Кездесу барысында «Ақниет Holding» ЖШС кадр бөлімінің маманы Рита Майсанова компаниядағы инклюзивті жұмыс тәжірибесіне тоқталды. Оның айтуынша, кәсіпорында 3-топ мүгедектігі бар азаматтарды жұмысқа қабылдау қарастырылғанын айтты. Қазіргі таңда олар үшін түрлі жұмыс орындары ұсынылып, тұрақты еңбек етуіне барлық жағдай жасалуда.
Атап айтқанда, қызметкерлердің жеке мүмкіндіктері мен денсаулық жағдайына сай бейімделген жұмыс орындары мен қолайлы еңбек ортасын қалыптастыруға ерекше көңіл бөлінуде. Компания әлеуметтік жауапкершілік аясында инклюзивті мәдениетті дамытуға басымдық беріп отыр.
Жиында Түркістан облыстық білім басқармасының басшысы Ғалымжан Орынов өңірдегі инклюзивті білім беру саласында атқарылып жатқан жұмыстар туралы баяндады. Оның айтуынша, ерекше қажеттілігі бар мектеп бітірушілерді қолдау – бүгінгі күннің өзекті міндеттерінің бірі.
Жиын қорытындысында тараптар «Шексіз мүмкіндік» жобасын бірлесіп жүзеге асыру жөніндегі ынтымақтастық меморандумына қол қойды. Құжат аясында ерекше қажеттілігі бар жастарды оқуға тарту, кәсіби бағдар беру және жұмысқа орналастыру бағытындағы жұмыстар жүйелі түрде жүргізілмек.
Бұл бастама – ерекше қажеттілігі бар азаматтардың қоғам өміріне белсенді араласуына жол ашып, олардың экономикалық дербестігін арттыруға серпін беретін маңызды қадам.
