Түркістанда Құрылыс және тұрғын үй-коммуналдық шаруашылығы салалық кеңесінің кәсіпкерлікті дамыту және қауіпсіз бизнес-ортаны қалыптастыру бағытында маңызды кездесуі өтті. Түркістан облысы Кәсіпкерлер палатасында Төтенше жағдайлар департаменті мен кәсіпкерлік қауымдастық өкілдері өзара ынтымақтастық туралы меморандумға қол қойды.
Құжаттың мақсаты – кәсіпкерлердің құқықтарын қорғау, әкімшілік кедергілерді азайту және бизнеске қолайлы әрі қауіпсіз жағдай жасау. Тараптар осы бағытта бірлесіп жүйелі жұмыс жүргізуге келісті.
Меморандум аясында кәсіпкерлерге мемлекеттік қызметтерді алу тәртібін түсіндіру жұмыстары күшейтіледі. Бұл олардың құқықтық сауаттылығын арттырып, қызмет алу процесін жеңілдетеді.
Сонымен қатар, құрылыс нысандарын салу және пайдалануға беру кезінде өрт қауіпсіздігі талаптарын сақтау бағытында бірлескен жұмыстар жүргізіледі. Бұл адам өмірі мен мүліктің қауіпсіздігін қамтамасыз етуге ықпал етеді.
Жиында мемлекеттік қызмет көрсету ашықтығын арттыру, қоғамдық бақылауды дамыту және сыбайлас жемқорлықтың алдын алу мәселелері де талқыланды. Сондай-ақ, өзара іс-қимылға кедергі келтіретін проблемаларды анықтап, оларды шешу жолдары қарастырылмақ. Жаңадан салынған немесе жаңғыртылған нысандарға қатысты арыз-шағымдар бірлескен комиссияда қаралады.
Меморандумда кәсіпкерлер үшін маңызды норма да қарастырылған: мемлекеттік органдар тарапынан заңда көзделмеген артық талаптар қоюға және негізсіз құжаттар сұратуға жол берілмейді.
Жиын барысында Түркістан облысы Кәсіпкерлер палатасының директоры Асылан Ибадуллаев құжаттың маңыздылығына ерекше тоқталды:
«Бұл меморандум – кәсіпкерлер үшін қауіпсіз әрі ашық орта қалыптастыруға бағытталған нақты қадам. Негізгі мақсат – бизнеске кедергі келтіретін артық талаптарды азайту», – деді ол.
Құжат бір жыл мерзімге жасалып, тараптардың келісімімен ұзартылуы мүмкін.
Жиынға қатысушылар бастама өңірде тұрақты және қауіпсіз бизнес-ортаны қалыптастыруға оң әсер етеді деген сенім білдірді.
