Бүгін Шымкент қаласында этнос өкілдерінің балалары арасында қазақ тілін ілгерілетуге бағытталған республикалық «Мың жүйрік» ағартушылық жобасының жеңімпаздарын марапаттау рәсімі өтті.
Бұл игі бастама жас ұрпақтың мемлекеттік тілге деген қызығушылығын арттыруды, қазақ тілін жетік меңгерген дарынды балаларды анықтауды және олардың шығармашылық қабілеттерін дамытуға жағдай жасауды мақсат етеді.
Жоба аясында қатысушылар қазақ тілін меңгеру деңгейі мен шығармашылық қабілеттерін бейнеролик және эссе форматында көрсетті. Биыл байқауға еліміздің жеті аймағынан жүзге жуық өтінім қабылданып, қатысушылардың еңбегін арнайы құрылған қазылар алқасы бағалады.
Марапаттау рәсіміне Шымкент қаласының Қазақстан халқы Ассамблеясы жанындағы Ақсақалдар кеңесінің мүшесі Иманалы Байдаулетов, қаламыздағы этномәдени бірлестіктердің төрағалары мен өкілдері, сондай-ақ Ассамблея жастары қатысты.
– Аталған жобаға Мемлекет басшысы Қасым-Жомарт Кемелұлы Тоқаевтың қазақ тілінің ұлтаралық қатынас тілі ретінде мәртебесін ілгерілетуді көздеген байқау 5 бағытта өрбіді. Бақ сынаған балалар мемлекеттік тілде мүдірмей сөйлеп, түрлі шығармалардан үзінділер оқып, қазақ тілін жетік меңгергенін дәлелдеді. Біз еліміздің мемлекеттік тілін дәріптеп, насихаттауға бағытталған байсалды бастамаларды қолдауға әрдайым дайынбыз! Ойын қазақша еркін жеткізетін, мемлекеттік тілден мүдірмейтін балалардың бүгінгі жеңістері өмірлік толағай табыстармен жалғаса бергей! – деді Иманалы Оспанұлы.
Салтанатты жиында жеңімпаздарға алғыс хаттар мен естелік сыйлықтар табыс етілді.
«Мың жүйрік» жобасы – этносаралық келісім мен қоғамдық бірліктің нақты көрінісі. Бұл бастама өзге ұлт өкілдері арасындағы қазақ тілін үйренуге деген ынтаны күшейтіп, тіл арқылы ортақ мәдени құндылықтарды біріктіруге жол ашады. Тіл – бірліктің, түсіністіктің және өзара құрметтің діңгегі. Сондықтан мұндай жобалар еліміздің рухани жаңғыруының маңызды бөлігі болып саналады.
Қазақ тілін меңгеру тек тілдік дағды емес, ол ұлттық болмыс пен мәдениетті тану, тарихи тамырды сезіну үдерісі. «Мың жүйрік» секілді жобалар жастарды отансүйгіштікке, мәдениетаралық қарым-қатынас мәдениетін қалыптастыруға және рухани баюға жетелейді. Бұл іс-шараның республикалық деңгейде өткізілуі – Қазақстанның тіл саясатының сәтті жүзеге асырылып келе жатқанын айғақтайды.
Байқау нәтижесінде қатысушылардың шығармашылық әлеуеті мен тілге деген сүйіспеншілігі ерекше байқалды. Балалардың қазақ тілінде еркін сөйлеп, ұлттық поэзия мен әдебиеттен үзінділер келтіруі олардың терең білімін және мемлекеттік тілге құрметін көрсетті.
Болашақта мұндай жобалар аясында қазақ тілін оқыту әдістемелерін жетілдіру, цифрлық платформада бейне-сабақтар мен онлайн-курстар әзірлеу жоспарланып отыр. Бұл жастардың тілді меңгеру мүмкіндігін арттырып, заманауи форматтағы тілдік білім беруді дамытуға жол ашады.
«Мың жүйрік» жобасы – ұлт пен ұлтты жақындастыратын, мемлекеттік тілдің мерейін өсіретін игі бастама. Тілге деген құрмет – елге деген құрмет. Сондықтан бұл байқаудың әр қатысушысы – еліміздің көпұлтты қоғамындағы татулық пен мәдени бірліктің жас елшісі.
#ҚХА30жыл #30летАНК #Шымкент #shymkent
ШЫМКЕНТТЕ «МЫҢ ЖҮЙРІК» РЕСПУБЛИКАЛЫҚ ЖОБАСЫНЫҢ ЖЕҢІМПАЗДАРЫ МАРАПАТТАЛДЫ
