Шымкент қаласында әлеуметтік маңызы бар сиыр етінің бағасы тұрақты. Кеше БАҚ беттерінде сиыр етінің қымбаттағаны жөнінде ақпараттар тараған еді. Бүгін қалалық ауылшаруашылығы және ветеринария басқармасының басшысы Талғат Мекамбаев бағаны бақылау, тұрақтандыру бойынша БАҚ өкілдеріне атқарылған жұмыстарды баяндап, Qazet, “Магнум” сауда желілеріндегі бағаны бірге бақылады. Аталған сауда желілерінде сиыр еті белгіленген бағада сатылып жатыр.
Шаһарда бірінші қажетті азық-түлік тауарлардың бағасын тұрақтандыру бойынша бірқатар кәсіпкерлік нысандары, сауда желілері, үй маңындағы дүкендер, жергілікті тауар өндірушілермен келісімдер жасалған.
Қалалық ауылшаруашылығы және ветеринария басқармасының басшысы Талғат Мекамбаевтың айтуынша, Шымкент қаласының базарларына еттің негізгі бөлігі Түркістан облысынан, оның ішінде етті мал шаруашылығында алдыңғы қатарлы Қарабұлақ ауылынан жеткізіледі.
Бүгінде жемнің бағасы (астық, құрама жем, шөп) өскен. Бұл сиыр етінің өзіндік құнын арттырады.
Бағаны тұрақтандыру бағытында «айналмалы схема» тетігі бойынша «Magnum» және «Gramad» сауда желілерімен келісім-шарттар жасалып, сиыр еті бір келіге 2590 теңгеден белгіленген бағамен сатылуда.
Сондай-ақ, «Қасқасу-С» және «Бәйтерек» шаруа қожалықтарымен еттің келісі 2620 теңге бойынша келісім-шарт жасалған.
Жалпы, сиыр етін қаладағы 60-қа жуық сауда орындарынан бекітілген әлеуметтік бағамен сатып алуға болады.
Жалпы, бірінші қажетті азық-түлік тауарларының бағасы тұрақты бақылауда.
