Мемлекет басшысы елімізде бұқаралық, әуесқой спорт түрлеріне ерекше көңіл бөлудің маңыздылығын өзінің биылғы Жолдауында да атап айтты. Өйткені спорттың қай түрі болсын адамның денсаулығын сақтауға, шынықтыруға әсер етумен қатар еліміздің беделін халықаралық аренада көтеруге де көмектеседі. Сондықтан да елімізде, оның ішінде Түркістан облысында да спортқа жасөсіпірімдерден бастап қызығушылық тудырып, тиянақты айналысуына ынталандыру арқылы мықты спортшылар тәрбиелеуге маңыз берілуде. Облысымызда аудандық, облыстық, республкалық жарыстарға қоса халықаралық турнирлерде де жерлестеріміз жүлделер алып жүр.
Албания мемлекетінің Тирана қаласында таеквондодан «Albanian Open G1» рейтингілік халықаралық турнирі өтті. Турнирде Қазақстан құрамасы командалық есепте үздіктер қатарында болды. Ортақ жеңіске Түркістан облысының спортшылары да қомақты үлес қосты.
Халықаралық жарыста ел намысын қорғап, жеңімпаз атанған спортшыларымыз 1 алтын, 2 күміс, 2 қола жүлде еншіледі. Дүбірлі сында 87 келіде Нұрлан Мырзабаев бірінші орын алса, 63 келідегі Аманбол Бегімбетов пен 74 келіде бақ сынған Мақсат Орынбасар күміс медаль жеңіп алды. Ал Әзірет Дүйсенбек (58 келі) мен Асқар Өтеген (63 келі) қола медаль еншіледі. Спортшыларды білікті бапкер Ренат Құралбаев баптады.
Шахмат сияқты интеллектуалды спорт түрін облыста дамытуға көңіл бөлінуде. «Шахмат керуені» жобасы аясында Созақ ауданының ашық біріншілігі өтті. Ашық біріншіліктің алауын жаққан Созақ ауданы әкімінің орынбасары Серік Сахиұлы Маманов «Шахмат – адамның ақыл-ой ұшқырлығы мен шығармашылық қабілетін дамытуға, тапқырлық пен жылдам шешім қабылдауға ынталандыратын спорт түрі. Сондықтан Республика Президенті Қасым-Жомарт Тоқаевтың елімізде инттелектуалды ойын – шахмат өнеріне ерекше көңіл бөліп отыр.» дей келе, шаршы тақта шеберлеріне сәттілік тіледі.
Созақ ауданының Ардагерлер кеңесі төрағасы Қабылбек Аманбекұлы Еспенбетов «Шахмат — спорт қана емес, үлкен өнер, мәдениет. Интеллектуалды ұлт қалыптастырудағы ролі де зор.» деді. Дүбірлі доданы ұйымдастырушыларға алғыс білдірді. Халықаралық дәрежедегі шахмат жаттықтырушысы Қуанышбек Жұмадуллаев, «Интеллектуаллы ұлт» жобасының авторы Балтабек Түйетаев сөз алып, шахмат спортының бұқаралығын арттыра түсуге шақырды.
Дүбірлі дода жүлделерін ересектер арасында: 1-орын Тастанбек Абылай, 2-орын Ерболатұлы Еркебұлан, 3-орын Қанжарбай Медеу бөлісті.
Ардагерлер арасында: 1-орынды Рабиев Толқын, 2-орынды Джумадуллаев Қуанышбек , 3-орынды Құдайберген Бақыт қанжығаларына байлады.
Ал командалық сайыста 1-орынды «Карлсон» командасы, 2-орынды «Альфа» командасы, 3-орынды «Каспаров» командасы еншіледі.
Түркістан облысының құрылуына 6 жыл толуына орай, Жетісай аудандық мәдениет, тілдерді дамыту, дене шынықтыру және спорт бөлімінің ұйымдастыруымен волейболдан қыздар арасында Түркістан облысының VI спартакиадасы өтті. Бекзат Саттарханов атындағы спорт кешенінде өткен байрақты бәсекеге Шардара, Келес, Бәйдібек, Сайрам, Сарыағаш, Түлкібас, Түркістан, Отырар, Мақтаарал және Жетісай аудандарынан келген 10 командада 100-ге тарта спортшы өзара мықтыны анықтады.
Жарыс қорытындысы бойынша жүлделі ІІІ орынға Сайрам ауданының құрамасы табан тіресе, ІІ орын Жетісай ауданының бұрымдыларына бұйырды. Ал, жүлделі І орынды Шардара ауданының құрамасы алып, чемпион атанды. Сондай-ақ өзінің шапшаңдығымен және ептілігімен көзге түскен Сайрам ауданы құрама командасының спортшысы Махми Жұмантаева спартакиаданың «Үздік ойыншы» номинациясымен марапатталды.
Жүлделі орынға ие болған командалар мен үздік ойын үлгісін көрсеткен жекелеген ойыншылар бағалы сыйлықтарымен және арнайы дипломдармен марапатталды.
Сайрам ауданы әкімінің баспасөз қызметі
