Соңғы онжылдықта әлемде нешетүрлі аурулардың тарауы мен пайда болуы халықтың денсаулығын сақтау саласында үлкен жауапкершілік пен жаңғыртулардың қажет екенін көрсетіп берді. Әлі аяқталып бітпеген пандемия кезінде де бірқатар кемшіліктердің беті ашылып, Мемлекет басшысы қазақстандықтардың денсаулығын сақтау, ел медициналық қызмет көрсету саласын жетілдіру бойынша бірқатар нақты шараларды, өзгерістірді қолға алып, өаманауи медициналық саланы қалыптастыру қажеттігін айтқан болатын. Соған орай республика бойынша денсаулық сақтау саласына, медициналық қызмет көрсету жұмысының деңгейіне үлкен жауапкершілікпен қарау қалыптасып келеді.
Елімізде денсаулық сақтау саласындағы дезинфекциялау мен дезинсекциялау және дератизациялау бойынша қызметтер көрсетуге лицензия беру қолға алынды. Аталған құжатты рәсімдемеген залалсыздандыру ұйымдарына жоғарыда аталған қызметтерді көрсетуге тыйым салынбақ. Бұл жайында Түркістан облысының санитарлық-эпидемиологиялық бақылау департаменті басшысының орынбасары Асқар Ысқақов бұқаралық ақпарат өкілдерімен өткен брифингте мәлімдеді.
— Облыс аумағындағы жоғарыдағы аталған қызметтерге лицензия беру шараларын Түркістан облысының санитариялық-эпидемиологиялық бақылау департаменті көрсетеді. Бұл қызмет электронды түрде жүзеге асырылмақ. Өтініш электрондық үкімет www.egov.kz, www.elicense.kz веб-порталы арқылы жіберіледі. Лицензия беру мерзімі – 15 жұмыс күні ішінде, ал лицензияны қайта рәсімдеу – 3 жұмыс күнінде жауап беріледі,- деді спикер.
Сонымен қатар, Асқар Бекболатұлы лицензия алуға қажетті құжаттармен таныстырды. Ең алдымен қызмет көрсетуші мекемелер облыстық санитарлық-эпидемиологиялық бақылау департаментіне өтінішін қалдыруы керек. Сондай-ақ, дезинфекциялау, дезинсекциялау, дератизациялау бойынша кәсіптік өзін-өзі реттеу ұйымдарында сертификациялық курстан өткен санитариялық-эпидемиологиялық қызметтің дәрігері немесе маманы және нұсқаушы-дезинфектордың болуы шарт. Онымен қоса, құжат рәсімделуі үшін ұйым 10 айлық есептік көрсеткіш көлемінде ақы төлеуі қажет.
Осылайша облыс аумағында залалсыздандыру бағытындағы атқарылатын жұмыстарға жауапкершілік пен талап күшейтілуде. Бұның өзі тұрғындардың денсаулығына қауіп төнуіе болдырмау, халықтың денсаулығын сақтау мен сапалы медициналық қызмет көрсетуді жолға қою болып табылады.
