Бүгін Шымкент қаласында «Есжанұлы Сейітжан қари» мешітінің ашылу рәсімі өтті.
Игі іс-шараға көпшілікпен қатар ғұмырын Құран жазуға арнаған түбі түркістандық жерлесіміз, әйгілі каллиграф, Сауд Арабиясынан арнайы келген Осман Тоһа да қатысты. Оның ұлты қазақ. Қадірлі мейманға Мемлекет басшысының дұғай сәлемі жеткізіліп, иығына шапан жабылды. 95 жастағы қарияның атажұртына алғаш табаны тиюі екен.
Баспасөзге берген сұхбатында ол: «…Сендерді көргенде бабамды көргендей болдым. Менің бабамның түрлері сендерден аумайтын кісі болатын. Біздің ата-бабаларымыз Ясауидан 150 жыл алдын көшіп кеткен» дейді. Сирияға келіп, кейін 80-жылдары Сауд Арабиясына келіп, 3 жыл Құран кітабын өз қолымен жазған екен.
Сондай-ақ Бас мүфти Наурызбай қажы Тағанұлы зәулім мешітті салуға демеушілік жасаған белгілі меценат Серікжан Сейтжанұлына алғысын жеткізді. Сәулеті мен сәні жарасқан мешіттің имамы болып елімізге танымал қари, діни салада тәжірибесі мол Ерсін Әміре тағайындалды.
Жаңа мешітте бір мезетте 12 мың адам құлшылығын өтей алады. Мешітте конференция залы, 600 адамға арналған асхана, жастарға рухани білім беретін медресе, неке қию залы, 736 көлік сиятын жерасты автокөлік тұрағы бар.
Құрылыс барысында Қожа Ахмет Ясауи кесенесін салу кезінде қолданылған ерте кездегі сәулет технологиялары ескерілген. Бұл негізгі желдетуге көмекші ретінде табиғи желдетуді қолдану принципі. Басқа да инновациялық шешімдер қолданылды. Мешітке кірер алдында 10000 адамға дейін сыятын алаң бар. Қолайсыз ауа-райынан қорғау үшін Меккеде орналасқан Әл-Харам мешітіне ұқсас ашылатын қолшатырлар жүйесі қарастырылған.
Жаңа мешіт ізгіліктің, бірлік пен берекенің, білім мен сүйіспеншіліктің ордасы болғай!
