Бүгін Президент Қасым-Жомарт Тоқаевтың төрағалығымен Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясы өтті.
Сессияда Мемлекет басшысы өзекті мәселелерді көтерді. Өз сөзінде Президент әр адамның ой-санасы және мінез-құлқы жақсарса, тұтас қоғам жақсаратынын ерекше атап өтті.
«Ассамблея жастардың идеологиялық тәрбиесін айрықша назарда ұстайды. Бұл – болашақта не боларын болжап білу мүмкін емес, қазіргідей алмағайып әлемде аса маңызды мәселе. Ассамблея этносаралық коммуникация орталықтарын дамытумен және осындай жаңа орталықтар ашумен айналысады. Сондай-ақ әлеуметтік маңызы бар жобаларды қолдап, еріктілерді және жергілікті бірлестіктерді ынталандырумен шұғылданады», — деді Президент.
Мемлекет басшысы Ұлттық құрылтайда қазір елге қауіп төндіріп тұрған бес кеселге тоқталғанын еске салды.
«Ассамблея нашақорлық, құмарпаздық (лудомания), тұрмыстық зорлық-зомбылық, вандализм және ысырапшылдық сияқты әлеуметтік кеселдермен күресу ісінде маңызды рөл атқарады. Қауіпсіз өмір сүру үшін осындай қатерлі құбылыстардан біржола арылуымыз керек. Бұл – әсіресе, ұрпақтың болашағы үшін айрықша маңызды. Біз балалар мен жастарды барынша қорғап, дұрыс тәрбиелеуіміз қажет. Қоғамдық кеселдерді түбірімен жоямыз десек, ортақ іске бүкіл ел болып жұмылған жөн», — деді Қасым-Жомарт Тоқаев.
Президент оған ұлтына, дініне, әлеуметтік жағдайына қарамастан, барлығы атсалысуы керектігін баса айтты.
«Ұлы істер шағын әрекеттерден басталады». Сол сияқты кішігірім әрекеттер ауқымды өзгерістерге жол ашады. Әр адамның ой-санасы және мінез-құлқы жақсарса, тұтас қоғам жақсарады. Мақсат-мұраты биік болса, елдің рухы да биік болады. «Адал азамат» болу аса маңызды. Бір сөзбен айтсақ, келеңсіз үрдістерден жай ғана жирену жеткіліксіз. Оны жоюға да белсене атсалысу керек», — деді Мемлекет басшысы.
Осы орайда Мұхтар Әуезовтің «Ел боламын десең – бесігіңді түзе» деген сөзі еске түседі. Ұрпағымызды жастайынан дұрыс тәрбиелеп, ысырапшылдық, зорлық-зомбылық, нашақорлық пен құмар ойындарына деген әуестіктің алдын алу — біздің басты міндетіміз.
Юлдаш Султанов,
Түркістан облыстық тәжік этномәдени бірлестігінің төрағасы
