Еліміздің бірнеше өңіріндегі су тасқынына байланысты Келес ауданының тұрғындары гуманитарлық көмек қабылдайтын штаб құрып, жергілікті тұрғындардың көмектерін қабылдауда. Қарғын су апаты аймағындағы зардап шеккен тұрғындарға көмек қолын созамын деген аудан тұрғындары игі іске өз үлестерін қосуда. Қайырымдылық шарасын ұйымдастыруда аудандық Орталық мешіттің бас имамы Жорабай Дулатбаев пен Абай ауылының биі Рахматулла Ермеков белсенділік танытуда.
– Өздеріңізге белгілі еліміздің батыс, солтүстік, шығыс өңірлерінде су тасқыны орын алып, тұрғындар қиын жағдайға тап болды. Қиындықты бірлесе еңсереміз деген ниетте Келес ауданының тұрғындары бірігіп, гуманитарлық көмек жинауды бастап кеттік. Көмектесемін деген азаматтарымыздың қарасы қалың. Саудада жүрген кәсіпкерлеріміз ұн, ең қажетті және жолға жарамды заттармен қамтып үлгерді. Қайырымдылық жасауға бекінген азаматтарымызға жеке басқа арналған гигиеналық заттар мен киім-кешек, көрпе-төсек, тұрмысқа қажетті заттарды жеткізуді сұранудамыз. Көпшілігі қаржылай да көмек көрсетуде. Алдағы уақытта жиналған елдің аманатын тиісті орынға тікелей Келес ауданының тұрғындары атынан жеткізетін боламыз, — дейді ауыл биі Рахматулла Ермеков.
Сондай-ақ, ауданның бас имамы игі іске үлес қосқан Келес ауданының жұртшылығына, жастарына, кәсіпкерлеріне ризашылығын білдіріп, су тасқынынан зардап шеккен өңірлерге қолдау көрсету жұмыстары жалғасатынын жеткізді. Айта кетейік, бүгінгі дейін аудандық Жастар ресурстық орталығының ұйымдастыруымен Түркістан қаласы арқылы Ақтөбе облысына азық-түлік керуені жіберілген болатын. Бүгінде жаппай аудан тұрғындары бірлескен түрде қайырымдылық шарасына атсалысуда.
(с) Келес ауданы әкімдігінің баспасөз қызметі
