Елімізде орын алған қарғын судан зардап шеккендерге арнап келестіктер жылу жинады. Ауыл билері мен имамдардың ұйымдастыруымен қолға алынған қайырымдылық шарасына барша аудан тұрғындары атсалысты. Бүгін гуманитарлық көмектің алғашқы легі жолға шықты. Ел жылуын тиісті орынға шығарып салуға Келес ауданының әкімі Жәнібек Ағыбаев қатысып, ақ жол тіледі.
– Осыдан 15 жыл бұрын өңірімізде су тасып, тұрғындарымыз әбігерге түскен уақытта ел болып қазақ елі көмек көрсеткен болатын. Сондай-ақ Мақтаарал және Арыста орын алған табиғи апаттарды да ел болып еңсердік. Еліміздің батыс, солтүстік және шығымындағы қарғын судан зардап шеккен азаматтарға да бірлігімізді көрсетіп, қиындықтан бірге шығатын боламыз. Қиын жағдайда қалған жерлестерімізге көмек ұйымдастырған барша аудан тұрғындарына өз алғысымды білдіремін. Қайырымдылық шарасына аудан тұрғындарымен бірқатарда әкімдік қызметшілерімен барша әлеуметтік, құрылымдық бөлімдер атсалысты. Баршаларыңыздың отбасыларыңызға бірлік, береке тілеймін, — деді аудан басшысы өз сөзінде.
Айта кетейік, ұйымдастырушылар Ақтөбе облысында құрылған штабпен байланысып, қажетті заттардың тізімін алды. Барша аудан тұрғындары атсалысқан шарада 10 млн теңгеден астам қаржы жиналып, қажетті заттар алынды. Тұрғындар да әр сәт сайын қажетті заттарды жылу жиналған жүк көлігіне табыстауда. Алдағы уақытта тағыда келестіктер атынан гуманитарлық көмек жіберілетін болады.
Келес ауданы әкімдігінің баспасөз қызметі
