Мемлекет басшысы Қасым-Жомарт Тоқаев еліміздің бірқатар облысындағы су тасқыны салдарынан қалыптасқан күрделі жағдайға байланысты Қазақстан халқына үндеу жариялады.
Президент қауіпті аймақтарда су тасқынына қарсы іс-шаралар бойынша жұмысты жалғастыру, халықтың қауіпсіздігін қамтамасыз ету және инфрақұрылымды сақтаудағы маңызды қадамдар туралы айтып өтті.
Су тасқынының жиілігі мен қарқындылығына қарсы жұмысты нығайтуды жалғастыру және бақылауға ұстау керектігін атап өтті.
Зардап шектен отбасылар мен аймақтарға тиісті түрде көмек көрсетіліп, мемлекеттік резервтен қауіпті аймақтарға көмек жіберілетінін айтты.
— Бұл – табиғи апат. Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады, — деді Президент.
Тұрақты және жүйелі жұмысты жүргізіп, қоғамның қауіпсіздігі мен әл-ауқатын қамтамасыз ету — басты міндет.
Су тасқыны кезеңінде қыстағы жауған қар еріп, судың арнасынан асуы, дамбалардың толуы елімізді әбігерге салып жатқаны жасырын емес. Сонымен қатар, қыста жауын-шашынның көп болуына байланысты топырақ та ылғал.
Көлденең келген қиыншылық су тасқынының алдын алып, салдарын жоюға көмек қолын созу әрқайсымыздың міндетіміз деп ойлаймын! Барлық өңірде су тасқынына қарсы жұмыстарды күшейту, ең алдымен азаматтардың қауіпсіздігін қамтамасыз ету маңызды.
Бұл сынақтан да халқымыз ауызбіршіліктің арқасында шығады деп білемін! Жұмыла көтерген жүк жеңіл. Еліміз аман болсын!
Қайрат ЗАЙНИШЕВ,
Казинформ.кз сайтының Түркістан облысындағы меншікті тілшісі, Түркістан облысы ҚХА жанындағы журналистер мен блогерлер клубының мүшесі
