Келес ауданында ұлттық спорт түрлерін дамыту басты назарға алынған. Оның ішінде ат спорты, қазақ күресі, асық ату, тоғызқұмалақ сынды ұлттық құндылықтарымызды насихаттауға айналған спорттық шараларға басымдылықтар берілуде.
Осы орайда Келес ауданы әкімдігінің қаулысымен Келес ауданының ішкі саясат, мәдениет, тілдерді дамыту және спорт бөлімі жанынан «Келес аудандық ұлттық спорт клубы» коммуналдық мемлекеттік мекемесі құрылды. Мекемеде жалпы 25 штаттық бірлік болып, 9 әкімшілік қызметкерлер, 16 жаттықтырушы спорттың 8 түрі бойынша спортшыларды дайындайды. Атап айтқанда көкпар, қазақ күресі, аударыспақ, жамбы ату, тоғызқұмалақ, теңге ілу, асық ату, ұлттық жекпе-жек спорт секциялары бойынша жаттыға алады. Бұл туралы аудан басшысы Жәнібек Ағыбаевтың төрағалығымен өткен аппараттық жиында ауданының ішкі саясат, мәдениет, тілдерді дамыту және спорт бөлімінің басшысы Даурен Ілесов мәлімдеді.
– Бүгінгі күнге ұлттық спорт түрлерімен шұғылданатын спортшылар саны жыл сайын артып келеді. Сұранысқа сай құрылған мекеме бүгінде арендалық ғимаратқа орналасқанымен жыл соңында құрылыс аяқталуы жоспарланған спорт комплексінде жұмысын жалғастырмақ. Сондай-ақ жастарды спортқа баулу мақсатында Келес спорт клубы ашылып, онда бүгінде спорттың 4 түрінен 1330 жасөспірім оқушылар шұғылданады. Ал, бұқаралық спортты дамыту мақсатында өткен жылы бекітілген жоспарға сәйкес, аудан аумағында 72 бұқаралық спорттық іс-шаралар өткізіліп, оған 6 150 адам қатысты, — деді Даурен Ілесов.
Дербес бөлім басшысы өз баяндамасында аудандағы саяси-ахуал, мәдениет саласын дамыту мен бұқаралық спортты дамыту, жастар саясатында жүзеге асып жатқан жобалар бойынша атқарылып жатқан жұмыстарды атап өтті. Өз кезегінде аудан басшысы аталған бөлімнің жұмысы күрделі әрі жауапкершілігі жоғары сала екенін айтып, жастарды спортпен шұғылдануға жағдай жасау барысында берілген тапсырмалардың орындалуы барысы мен алдағы жоспарлары туралы сұрады. Сонымен қатар, ауылдық елді мекендердегі тұрғындарға мәдени шараларды ұйымдастыруды, спорттық инфрақұрылымды жаңғырту бағытында нақты тапсырмаларды жүктеді.
